Տեղեկատվական կենտրոն
Նորություններ
Տեղի ունեցավ ՀՀ Արմավիրի մարզխորհրդի այս տարվա առաջին նիստը
18.02.2016
Այսօր տեղի ունեցավ ՀՀ Արմավիրի մարզխորհրդի այս տարվա առաջին նիստը, որը վարեց մարզպետ Աշոտ Ղահրամանյանը: Մարզխորհրդի նիստին մասնակցում էին փոխմարզպետներ Լարիսա Մուրադյանը, Դավիթ Սամսոնյանը, Մովսես Քարտաշյանը, մարզպետարանի աշխատակազմի ղեկավար Փառանձեմ Կարապետյանը և աշխատակազմի կառուցվածքային ստորաբաժանումների ղեկավարները, հանրապետական գործադիր մարմինների տարածքային ստորաբաժանումների և մարզպետարանի ենթակայության առողջապահական կազմակերպությունների պատասխանատուները, ջրօգտագործող ընկերությունների տնօրենները և համայնքների ղեկավարները:
Մարզխորհրդի նիստի օրակարգը հաստատման ներկայացնելուց հետո ՀՀ Արմավիրի մարզպետ Աշոտ Ղահրամանյանը հանդես եկավ իր 2015 թվականի գործունեության և մարզի սոցիալ-տնտեսական վիճակի մասին հաշվետվությամբ:
Մարզպետը մասնավորապես անդրադարձավ մարզպետարանի գործունեության կազմակերպման ընդհանուր հարցերին` ներկայացնելով տարածքային կառավարման, տեղական ինքնակառավարման և համայնքային ծառայության, հանրապետարական գործադիր մարմինների տարածքային ստորաբաժանումների գործունեության, ֆինանսական, արդյունաբերության, քաղաքաշինության, բնակարանային և կոմունալ տնտեսության, տրանսպորտի և ճանապարհաշինության, գյուղատնտեսության և բնապահպանության, հողաշինության և հողօգտագործման, առողջապահության և սոցիալական ապահովության, ընտանիքի, կանանց և երեխաների իրավունքների պաշտպանության, կրթության, մշակույթի և սպորտի, արտաքին կապերի և տեղեկատվության բնագավառներում իրականացված աշխատանքները:
Իր խոսքում մարզպետ Աշոտ Ղահրամանյանն ընդգծեց, որ 2015 թվականի ընթացքում Արմավիրի մարզում քաղաքական, սոցիալ-տնտեսական իրավիճակը եղել է կայուն: Ըստ նրա` ոլորտային ձեռքբերումներն ու հաջողությունները հնարավոր է եղել ապահովել բոլոր պետական կառույցների, տեղական, միջազգային և հասարակական կազմակերպությունների, ԶԼՄ-ների հետ սերտ համագործացության, ինչպես նաև Հայաստանի Հանրապետության Նախագահի, վարչապետի, նախարարների և այլ գերատեսչությունների ղեկավարների մարզ կատարած այցելությունների և տրված հանձնարարականների կատարման արդյունքում:
Ամփոփելով հաշվետվությունը` մարզպետ Աշոտ Ղահրամանյանը նշեց, որ 2015 թվականին բավարար մակարդակով աշխատանքներ են տարվել մարզի սեցիալ-տնտեսական վիճակի բարելավման ուղղությամբ` միաժամանակ ընդգծելով, որ չպետք է բավարարվել ունեցած ձեռքբերումներով, այլ պետք է նոր թափ հաղորդել նախատեսվող աշխատանքներին և բարձր մակարդակով լուծում տալ առկա խնդիրներին:
Օրակարգային հաջորդ հարցի կապակցությամբ 2016 թվականի գարնան գյուղատնտեսական աշխատանքների նախապատրաստման ընթացքի մասին զեկուցմամբ հանդես եկավ ՀՀ Արմավիրի մարզպետարանի աշխատակազմի գյուղատնտեսության և բնապահպանության վարչության պետ Արթուր Այվազյանը` շեշտելով, որ գարնան նախապատրաստական աշխատանքները մարզպետարանը, մարզի համայնքները, ջրօգտագործողների ընկերությունները և տնտեսվարող գյուղացիական, գյուղացիական կոլեկտիվ տնտեսությունները և ֆերմերները սկսել են դեռևս 2015 թվականի նոյեմբեր-դեկտեմբեր ամիսներից` մարզի զարգացման գերակա ուղղությունները և առաջնահերթ խնդիրները որոշելով և դրանք լուծելու համար համապատասխան ծրագրեր մշակելով:
Մարզում գյուղատնտեսական աշխատանքների նախապատրաստման շարքում կարևորելով ոռոգման համակարգերի մաքրման և վերանորոգման աշխատանքների իրականացումը` Արթուր Այվազյանը ոռոգման համակարգը սպասարկողներին և ջրօգտագործողներին կոչ արեց առավել կազմակերպված ու բարեխղճորեն կատարելու համակարգի կառուցման, մաքրման և վերանորոգման աշխատանքները, որպեսզի հնարավոր լինի արդյունավետ օգտագործել ոռոգման ջուրը, և կորուստները հասցվեն մինիմումի: Այս համատեքստում նա նշեց, որ առաջիկա 10 օրերի ընթացքում մարզպետարանի համապատասխան հանձնաժողովի կողմից կուսումնասիրվի համակարգում տիրող իրավիճակը և միջոցառումների համապատասխան ծրագիր կմշակվի:
Անդրադառնալով գյուղմթերքների արտադրությանը` գյուղատնտեսության և բնապահպանության վարչության պետը տեղեկացրեց, որ 2016 թվականին մարզի գյուղացիական տնտեսությունները կարող են զբաղվել լոլիկի մեծաքանակ արտադրությամբ, քանի որ մարզպետը մթերող կազմակերպությունների հետ ողջ արտադրանքը մթերելու վերաբերյալ պայմանավորվածություն է ձեռք բերել:
Նա իր խոսքում ընդգծեց նաև, որ ընթացիկ տարում նույնպես շարունակվելու են ՀՀ կառավարության կողմից գյուղատնտեսական աշխատանքների կազմակերպման նպատակով տրամադրվող աջակցության ծրագրերը, որոնց շրջանակում շուկայականից մատչելի գներով մարզին հատկացվել է 6000 տոննա ազոտական պարարտանյութ` 1 պարկը 6000 դրամով, 200 տոննա ֆոսֆորական և կալիումական պարարտանյութեր` 1 պարկը 7000 դրամով և 550 հազար լիտր դիզելային վառելանյութ` 1 լիտրը 280 դրամով: Գարնանացանի աշխատանքները խթանելու նպատակով էլ մարզին հատկացվել է 80 տոննա գարնանացան գարու և 5 տոննա առվույտի սերմացու, որի պահանջարկը ձևավորվել է համայնքների կողմից ներկայացված հայտերի հիման վրա:
Մարզխորհրդի օրակարգում ընդգրկված վեջին հարցի կապակցությամբ, անդրադառնալով մարզի համայնքներում կատարվող աղբահանության աշխատանքներին, Արթուր Այվազյանը նշեց, որ մարզպետ Աշոտ Ղահրամանյանի կողմից օրեր առաջ հաստատվել է մարզի վարչական տարածքի սանիտարական մաքրման սխեման` համաձայն որի համայնքապետերին առաջարկվում է հսկողության տակ վերցնել համայնքի սանիտարական մաքրման սխեմայով նախատեսված աղբահանության աշխատանքների ժամանակացույցը և կատարվող աշխատանքների որոկը, բացատրական աշխատանքներ տանել բնակչության շրջանում, որպեսզի զերծ մնան կենցաղային աղբը մայր, միջտնտեսային և ներտնտեսային ցանցեր, ինչպես նաև համայնքային ճանապարհներին նետելուց, իսկ հակառակ դեպքում նրանց ենթարկել վարչական պատասխանատվության:
Գյուղատնտեսության և բնապահպանության վարչության պետը տեղեկացրեց նաև, որ փետրվարի 22-ից մարզպետ Աշոտ Ղահրամանյանի համապատասխան կարգադրությամբ ստեղծված մշտական գործող հանձնաժողովը ստուգայցեր է կազմակերպելու համայնքներում` ստուգելու սխեմայով նախատեսված աշխատանքների ընթացքը: Խախտումներ արձանագրելու դեպքում, ըստ նրա, կազմվելու է արձանագրություն և ժամանակ է տրվելու այն վերացնելու համար, իսկ խախտումը կրկնվելու դեպքում համայնքի ղեկավարի գործունեությունը քննարկվելու է հանձնաժողովի նիստում:
Օրակարգային հարցի կապակցությամբ մարզպետ Աշոտ Ղահրամանյանն առաջարկեց ջրօգտագործող ընկերությունների տնօրեններին իրենց սպասարկման տարածքի ոռոգման ցանցերի մաքրման ընթացքում աջակցել կենցաղային աղբի տեղափոխման աշխատանքներին: Նա միաժամանակ աշխատանքային կարգապահության կոչ արեց համայնքապետերին` վստահեցնելով, որ նրանց գործունեությունը շարունակելու է մնալ իր ամենօրյա ուշադրության ներքո:
Օրակարգային հարցերի ավարտից հետո եղան նաև հայտարարություններ: