Տեղեկատվական կենտրոն
Նորություններ
Մարզպետն ընդունեց ՀՀ գերիների, պատանդների և անհայտ կորածների հարցերով զբաղվող հանձնաժողովի անդամներին
29.03.2016
ՀՀ Արմավիրի մարզպետ Աշոտ Ղահրամանյանն այսօր ընդունեց ՀՀ գերիների, պատանդների և անհայտ կորածների հարցերով զբաղվող հանձնաժողովի անդամներին` Աշխատանքի և սոցիալական հարցերով փոխնախարար Ջեմմա Բաղդասարյանին, ՀՀ ԶՈւ գլխավոր շտաբի օպերատի վարչության ավագ սպա, փոխգնդապետ Սամվել Ասատրյանին: Հանդիպմանը ներկա էր նաև մարզպետարանի աշխատակազմի առողջապահության և սոցիալական ապահովության հարցերով վարչության պետ Հովհաննես Հարությունյանը:
Ողջունելով հանձնաժողովի անդամներին` մարզպետը նշեց, որ նրանց գործունեությունն ունի մեծ նշանակություն, տարիներ ընթացքում նկատելի են ձեռքբերումները, որոնք կարող են նոր հաջողություններ ունենալու համար դրական հիմք հանդիսանալ: Նա կարևորեց գերիների, պատանդների և անհայտ կորածների ընտանիքների հետ հանձնաժողովի կողմից տարվող աշխատանքները, պարբերական բնույթ կրող հանդիպումները և նրանց շրջանում իրականացվող սոցիալական ծրագրերը:
«Հանուն հայրենիքի իրենց կյանքը վտանգած մեր զինվորները և նրանց ընտանիքները պետք է միշտ զգան պետության աջակցությունը և դրական վերաբերմունքը պետական բոլոր օղակների կողմից»,- իր խոսքում նշեց մարզպետ Աշոտ Ղահրամանյանը` այդ համատեքստում ներկայացնելով Արմավիրի մարզպետարանի կողմից իրականացվող աջակցության ծրագրերն ու ձեռնարկները:
Հանձնաժողովականներն այնուհետև հանդիպեցին գերիների, պատանդների և անհայտ կորածների ընտանիքների անդամների հետ: Հանդիպմանը ներկա գտնվեցին նաև Արմավիրի զինվորական կոմիսարը և Ռազմական բժիշկների ասոցացիայի ներկայացուցիչները: Հանդիպմանը քննարկվեցին երկկողմ հետաքրքրություն ներկայացող հարցեր, անդրադարձ եղավ նաև նախատեսվող ծրագրերին, առաջիկա անելիքներին: