Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանն այսօր ընդունեց Նորվեգիայի Ֆորդե քաղաքում ընթացող ծանրամարտի Եվրոպայի առաջնությունում մեդալներ նվաճած Արմավիրի մարզը ներկայացնող երեք ծանրորդներին` Անդրանիկ Կարապետյանին (ոսկե մեդալ), Սիմոն Մարտիրոսյանին  և Վանիկ Ավետիսյանին (բրոնզե մեդալներ): Նրանց ուղեկցում էր Գեղակերտի ծանրամարտի մարզադպրոցի տնօրեն, ծանրամարտի Հայաստանի հավաքականի մարզիչ Վիգեն Խաչատրյանը: Ընդունելությանը ներկա էին նաև փոխմարզպետներ Լարիսա Մուրադյանը, Գագիկ Գաբրիելյանը, մարզպետարանի աշխատակազմի ղեկավար Փառանձեմ Կարապետյանը, ինչպես նաև կրթության, մշակույթի և սպորտի վարչության պետ Գայանե Սայադյանը:

Ողջունելով ծանրամարտի Եվրոպայի առաջնության մեդալակիրներին` մարզպետ Աշոտ Ղահրամանյանը նշեց. «Շատ հաճելի է, երբ մարզի պատիվը բարձր եք պահում Եվրոպայում և աշխարհի բոլոր մրցահարթակներում: Ես համոզված եմ, որ ձեր մեջ եղած ուժն ու եռանդն այս սուրբ հողից է գալիս:

Այդ օրերին հանուն մեր ազգի դուք ձեր պայքարը մղեցիք և հաղթանակ տարաք Եվրոպայում, իսկ մեր զինվորները, հերոս տղաները` Ղարաբաղում: Հավերժ փառք նրանց, ովքեր իրենց կյանքը տվեցին հանուն հայրենիքի, և փառք ու պատիվ ձեզ, որ այդ օրերին Հայաստանի հաղթական դրոշը ծածանեցիք Նորվեգիայում…»:

Հայաստանի Հանրապետության սպորտի զարգացման գործում ունեցած ավանդի և Նորվեգիայում կայացած ծանրամարտի Եվրոպայի առաջնությունում չեմպիոնի կոչման արժանանալու համար մարզպետ Աշոտ Ղահրամանյանը պատվոգիր շնորհեց և դրամական պարգև հանձնեց Անդրանիկ Կարապետյանին: Մարզպետի կողմից պատվոգրի և դրամական պարգևի արժանացան նաև բրոնզե մեդալակիրներ Սիմոն Մարտիրոսյանը և Վանիկ Ավետիսյանը:

Հայաստանի Հանրապետության սպորտի զարգացման գործում ունեցած ավանդի, մարզչական բեղմնավոր գործունեության և Նորվեգիայում կայացած ծանրամարտի Եվրոպայի առաջնությունում ձեռք բերած նվաճումների համար մարզպետը պատվոգիր շնորհեց նաև մարզիչ Վիգեն Խաչատրյանին:

Շնորհակալություն հայտնելով ջերմ ընդունելության համար` ծանրամարտի Եվրոպայի առաջնությունում չեմպիոնի կոչման արժանանացած Անդրանիկ Կարապետյանը վստահեցրեց, որ այսուհետ ավելի մեծ ձեռքբերումներ կունենան` բարձր պահելով և պետության, և մարզի պատիվը: Նա իր խոսքում նշեց, որ Արցախում տիրող պատերազմական վիճակը անտարբեր չէր թողել նաև իրենց, որի արդյունքում արել են հնարավորը` ժպիտ պարգևելու համար հայ ազգին, և մեծ հպարտությամբ իրենց հաղթանակը նվիրել են քառօրյա պատերազմում զոհված և կռված տղաներին:

Մարզիչ Վիգեն Խաչատրյանն էլ իր հերթին վստահեցրեց, որ մարզիկներն առաջիկայում ավելի մեծ հաղթանակներ են ունենալու` ամենուր բարձր պահելով հայ ազգի պատիվը: