Արմավիրի մարզպետի աշխատակազմ

ՀՀ Արմավիրի մարզպետ Աշոտ Ղահրամանյանն այսօր Սարդարապատ համայնքի միջնակարգ դպրոցում մասնակցեց Հայաստանում Գերմանիայի դեսպանի այցի կապակցությամբ կազմակերպված միջոցառմանը:

2007 թվականից կրթօջախը համագործակցում է գերմանական տարբեր հաստատությունների հետ` Գյոթեի ինստիտուտ, Գերմաներեն լեզվի կենտրոն, Հալլե քաղաքի Ռայլի անվան դպրոց: 2009 թվականից մասնակցում է «Աշակերտների փոխանակում» ծրագրին, 2013 թվականից էլ դարձել է գերմաներեն լեզվի դիպլոմի դպրոց, և այդ ծրագրի շրջանակներում ունի Գերմանիայում սովորող ուսանողներ: Համագործակցության այս ժամանակահատվածում Սարդարապատի դպրոցի շուրջ 50 աշակերտ եղել է Գերմանիայում, ծանոթացել գերմանական մշակույթին և կենցաղին:

Դպրոցի տնօրեն Անահիտ Մանուկյանի ուղեկցությամբ մարզպետ Աշոտ Ղահրամանյանը և դեսպան Մաթիաս Քիեսլերը ծանոթացան կրթօջախի և նրա սաների տարիների հաջողությունները ներկայացնող վկայականներին, խոսեցին ձեռքբերումների և առաջիկա ծրագրերի մասին:

Հայաստանում Գերմանիայի դեսպան Մաթիաս Քիեսլերին հյուրընկալելու կապակցությամբ կրթօջախում կազմակերպված ինքնատիպ միջոցառման ընթացքում աշակերտներն իրենց բողոքն ու խաղաղության կոչն արտահայտեցին պատերազմ հրահրող ազգերին` մինչ այդ մեկ րոպե լռությամբ հարգելով Արցախյան քառօյա պատերազմում զոհված քաջորդիների հիշատակը:

Ողջունելով ներկաներին` դեսպանը շնորհահակալություն հայտնեց ջերմ ընդունելության համար`նշելով, որ մեծապես տպավորված է այն ամենով, ինչ տեսել է բեմում: Նա խորը ցավ արտահայտեց վերջին օրերին Արցախում տեղի ունեցած դեպքերի առնչությամբ` իր ապրումակցումը հայտնելով վիրավոր զինվորներին և վշտակցությունը` զոհվածների ընտանիքներին` հույս հայտնելով, որ կհաջողվի վերահաստատել զինադադարը հակամարտության գոտում, և կրկին խաղաղություն կտիրի տարածաշրջանում:

Իր ողջույնը փոխանցելով ներկաներին և կարևորելով դեսպանի այցը կրթօջախ`մարզպետ Աշոտ Ղահրամանյանը նշեց, որ ցանկացած նմանատիպ այց իր դրական հետքն է թողնում և ուսուցչական կազմի, և աշակերտների վրա: Ի դեմս դեսպանի` նա իր երախտագիտությունը հայտնեց Գերմանիայի կառավարությանը` դպրոցին ցուցաբերած աջակցության և այն հաջողությունների համար, որոնց հասել են աշակերտներն այդ աջակցության շնորհիվ:

Խոսելով հայ ազգի բարձր մարդկային որակների, ազգային արժանապատվության և մեծ հայրենասիրության մասին` մարզպետն ընդգծեց, որ հայը խաղաղություն սիրող ազգ է, բայց հարկ եղած դեպքում գիտե պաշտպանել իր շահերը և պայքար մղել հանուն արդարության:

Միջոցառման հյուրերին, մասնակիցներին իր ողջույնի և երախտագիտության խոսքը փոխանցեց նաև դպրոցի տնօրեն Անահիտ Մանուկյանը` Հայաստանը, հայ մարդը և հայի հոգևոր արժեքները ներկայացնող գրքեր նվիրելով դեսպան Մաթիաս Քիեսլերին: