Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Խորհրդակցություն` հանրակրթական դպրոցների տնօրենների մասնակցությամբ
04.05.2016
ՀՀ Արմավիրի մարզպետարանում այսօր տեղի ունեցավ մարզի հանրակրթական դպրոցների տնօրենների հերթական խորհրդակցությունը` գլխավորությամբ մարզպետ Աշոտ Ղահրամանյանի և մարզպետարանի աշխատակազմի կրթության, մշակույթի և սպորտի վարչության պետ Գայանե Սայադյանի:
Ողջունելով ներկաներին` մարզպետ Աշոտ Ղահրամանյանը նրանց ուշադրությունը հրավիրեց ապրիլյան քառօրյա պատերազմից հետո Արցախից մարզ տեղափոխված շուրջ 66 դպրոցահասակ երեխաների ուսուցուման գործընթացը կազմակերպելու վրա` ընդգծելով, որ այդ երեխաները պետք է գտնվեն դպրոցի տնօրենի և ուսուցչական կազմի ամենօրյա ուշադրության և հոգատարության ներքո` իրենց զգալով ինչպես հայրենի դպրոցում: Անդրադարձ եղավ նաև մարզից հայրենիքի սահմանների պաշտպանության համար Արցախում հերոսաբար զոհված 6 զինծառայողների անունով համապատասխան համայնքների դպրոցներում ռազմագիտության դասասենյակների կամ դասարանների անվանակոչմանը:
Մարզպետն իր խոսքում տնօրեններին հորդորեց ուշադրություն դարձնել աշակերտների բացակայություններին և կարգապահությանը` կոչ անելով նույն ուժով ու եռանդով շարունակել իրենց աշխատանքները մինչև ուսումնական տարվա ավարտը: Նա ներկայացրեց նաև դպրոցաշինության ոլորտում նախատեսվող և ենթակառուցվածքների բարելավմանն ուղղված առաջիկա ծրագրերը:
Մարզպետարանի աշխատակազմի կրթության, մշակույթի և սպորտի վարչության պետ Գայանե Սայադյանը խոսեց պետական միասնական և ավարտական քննությունների նախապատրաստման և անցկացման մասին` միաժամանակ կոչ անելով ճիշտ ժամանակին քննությունների նախապատրաստական պարապմունքների և քննությունների ժամանակացույցը փակցնել դպրոցում` համապատասխան վահանակին: Նա հորդորեց տնօրեններին զերծ մնալ վերջին զանգի կապակցությամբ տոնական միջոցառումների կազմակերպումից` փոխարենն ունենալ վերջին դաս` խուսափելով անցանկալի իրավիճակներից:
Խորհրդակցության ընթացքում Գայանե Սայադյանն անդրադարձավ նաև 2015-2016 ուսումնական տարվա ուսումնական պլանի կատարողականի ապահովմանը:
