Տեղեկատվական կենտրոն
Նորություններ
Նշվեց Երեխաների պաշտպանության միջազգային օրը
01.06.2016
Երեխաների պաշտպանության միջազգային օրը սահմանվել է 1925 թվականին, Ժնևում՝ երեխաների պաշտպանության հարցերով համաշխարհային կոնֆերանսի ընթացքում: 1949 թվականին կանանց Ժողովրդավարական միջազգային դաշինքը Երեխաների պաշտպանության օր անցկացնելու որոշում է ընդունել:ՄԱԿ-ը, հավանություն տալով այս նախաձեռնությանը, հայտարարել է երեխաների կյանքի եւ առողջության պաշտպանության հարցը իր գործունեության գերակա ուղղություններից մեկը:
Առաջին անգամ հունիսի մեկը որպես Երեխաների պաշտպանության միջազգային օր նշվել է 1950 թվականին: Հայաստանը Երեխաների իրավունքների մասին կոնվենցիան վավերացրել է 1992թ., որից հետո՝ 1996թ., ընդունվել է «Երեխայի իրավունքների մասին» ՀՀ օրենքը:Հունիսի 1-ը նշում է գրեթե բոլոր հետխորհրդային երկրներում: Վերջին տարիներին այս օրվան են միացել նաև եվրոպական երկրներ, ԱՄՆ մի շարք նահանգներ:
Ինչպես ամենուր, այնպես էլ Արմավիրի մարզում օրը տոնական էր. բոլոր մշակութային, ժամանցային վայրերում կազմակերպվել էին միջոցառումներ` լցված մանկական ճիչերով ու ծիծաղով, երգ ու պարով:
Երեխաների պաշտպանության միջազգային օրվա կապակցությամբ «Մշակութային կազմակերպություն-դպրոց» աբոնենտային համակարգի ներդրման պիլոտային ծրագրի շրջանակում ՀՀ Արմավիրի մարզպետարանի աշխատակազմի կրթության, մշակույթի և սպորտի վարչությունը կազմակերպել էր դպրոցահասակ երեխաների այցելություևը Հայաստանի պատմության թանգարան և պետական պատկերասրահ, ապա նաև Ալեքսանդր Սպենդիարյանի անվան օպերայի և բալետի ազգային ակադեմիական թատրոն` դիտելու Անուշ օպերան:
Մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժինն էլ «Հաշմանդամ երեխաների ծնողների» հասարակական կազմակերպության հետ համատեղ այցելել էր մարզի հաշմանդամություն ունեցող երեխաներին, նվերներ հանձնել նրանց` մաղթելով մշտական բարձր տրամադրություն և հաճելի օրեր: