Արմավիրի մարզպետի աշխատակազմ

Այսօր ՀՀ Արմավիրի մարզ կատարած աշխատանքային այցի ընթացքում ՀՀ գյուղատնտեսության նախարար Սերգո Կարապետյանը մարզպետ Աշոտ Ղահրամանյանի ուղեկցությամբ այցելեց Եղեգնուտ համայնք, ծանոթացավ սպասվող բերքի ծավալներին և բանջար-բոստանային մշակաբույսերի բերքահավաքի ընթացքին:

Եղեգնուտ համայնքում նախարարը եղավ Ստյոպա Կարապետյանի գյուղացիական տնտեսությունում: Մենատնտեսն այս տարի ավելացրել է իր մշակովի հողատարածքները` դրանք հասցնելով 15 հեկտարի: 12 հեկտարի վրա աճեցվում է սմբուկ, իսկ մյուս 3 հեկտարի վրա` ձմերուկ: Ստյոպա Կարապետյանը 1 հեկտարից ակնկալում է 30 տոննա ձմերուկ, բարձր է նաև սմբուկի բերքատվությունը: Նա, ընդհանուր առմամբ, գոհ է և ստացված բերքից, և իրացման գնից: Նրա խոսքով` սմբուկի կիլոգրամը վաճառում է 300 դրամով, իսկ ձմերուկինը` 150 դրամով:

Համայնքապետ Ռազմիկ Մարգարյանի տեղեկացմամբ` համայնքում գյուղատնտեսական նշանակության հողատարածքները կազմում են 13000 հեկտար: Ըստ նրա` համայնքում հիմնականում զբաղվում են բանջար-բոստանային կուլտուրաների մշակությամբ, մասնավորապես` սմբուկի և ձմերուկի: Համայնքապետի խոսքով` ստացված բերքի իրացման հետ կապված խնդիրներ չեն առաջանում. բերքն իրացվում է մթերող կազմակերպությունների, արտահանողների և վերավաճառողների միջոցով: 

Մարզպետ Աշոտ Ղահրամանյանն իր խոսքում ուրախությամբ փաստեց, որ մարզում մեծ թափով սկսվել է բանջար-բոստանային կուլտուրաների և պտղի բերքահավաքը: Նա նշեց, որ նախորդ տարվա համեմատությամբ այս տարի մարզում 1700 հեկտար հողատարածք ավել է մշակվել, որից շուրջ 1200 հեկտարը զբաղեցնում են բանջար-բոստանային կուլտուրաների մշակովի տարածքները: Արդյունքում, ըստ մարզպետի, համապատասխան գյուղատնտեսական մթերքների ծավալը նախորդ տարվա համեմատությամբ կավելանա 40-45 հազար տոննայով:

Անդրադառնալով կարկտահարության հետևանքով առաջացած խնդիրներին` մարզպետ Աշոտ Ղահրամանյանը նշեց, որ համայնքային հանձնաժողովների կողմից գույքագրվել են կարկուտի հասցրած վնասները, դրանք ներկայացվել են մարզային հանձնաժողովին, որն էլ համապատասխան տվյալներն ամփոփել և ներկայացրել է ՀՀ տարածքային կառավարման և զարգացման, ինչպես նաև ՀՀ գյուղատնտեսության նախարարություններին: Մարզպետի խոսքով` նշված գերատեսչությունների ղեկավարները կարկուտի հասցրած վնասների ամփոփ տվյալները ներկայացրել են ՀՀ վարչապետին:

«Արարատյան դաշտավայրում պտուղ-բանջարեղենի բերքահավաքի եռուն շրջանը մեկնակել է, ինչի արդյունքում ներքին շուկայում արդեն զգալի գնանկում է նկատվում: Այսօր Եղեգնուտում հավաքել են ձմերուկի առաջին բերքը, մի քանի օր առաջ սմբուկի բերքահավաք է կատարվել: Մեր տվյալներով, չնայած գարնանը գրանցված կարկտահարության և ցրտահարության դեպքերին, Արմավիրի մարզում ընդհանուր առմամբ բավականին լավ բերք է սպասվում», – լրագրողների հետ ճեպազրույցում նշեց Սերգո Կարապետյանը:

Անդրադառնալով մարզի գյուղատնտեսության ոլորտում վերջին տարիներին արձանագրված հաջողություններին` նախարարը գոհունակությամբ նշեց, որ այստեղ բավականին լուրջ աշխատանքներ են տարվել, և ներկայումս մշակվող հողերը կազմում են ընդհանուր վարելահողերի շուրջ 86%-ը կամ 35770 հեկտար:

Նախարարն ընդգծեց, որ պտուղ-բանջարեղենի մշակության արմավիրցի շատ ֆերմերների փորձն արժանի է ընդօրինակման, այստեղ հստակորեն պահպանվում են ագրոտեխնիկայի կանոնները, ինչի շնորհիվ տարեցտարի ավելանում են բերքատվությունն ու արտադրության ծավալները: