Տեղեկատվական կենտրոն
Նորություններ
Տեղի ունեցավ մարզպետ Աշոտ Ղահրամանյանի մամլո ասուլիսը
27.07.2016
Այսօր տեղի ունեցավ ՀՀ Արմավիրի մարզպետ Աշոտ Ղահրամանյանի մամուլի ասուլիսը, որի ընթացքում մարզպետն ամփոփեց 2016 թվականի 1-ին կիսամյակի հիմնական ձեռքբերումներն ու ներկայացրեց առաջիկա անելիքները՝ ընդհանուր առմամբ հաջողված համարելով անցած վեց ամիսների ընթացքում ըստ ոլորտների իրականացված աշխատանքները և առկա ցուցանիշները:
Անդրադառնալով քաղաքաշինության ոլորտին՝ մարզպետ Աշոտ Ղահրամանյանը նշեց, որ ՀՀ 2016 թվականի պետական բյուջեով և ՀՀ Արմավիրի մարզպետարանի ծրագրերով մարզին հատկացվել է 146 մլն 898 հազ. դրամ, որից 50 մլն դրամի շրջանակներում նախատեսվել է իրականացնել մշակութային օբյեկտների հիմնանորոգում, իսկ 96 մլն 898 հազ. դրամով էլ` Ոսկեհատ, Փարաքար, Արտիմետ, ք.Արմավիր համայնքների մանկապարտեզների վերանորոգում, ինչպես նաև Թաիրով գյուղի միջնակարգ դպրոցի շենքի տեխնիկական վիճակի ուսումնասիրություն և վերանորոգման աշխատանքների նախագծանախահաշվային փաստաթղթերի մշակում:
Խոսելով ճանապարհաշինական ծրագրերի մասին՝ մարզպետ Աշոտ Ղահրամանյանը նշեց, որ պետական բյուջեից ՀՀ Արմավիրի մարզպետարանին մարզային նշանակության ավտոճանապարհների ընթացիկ պահպանման ու շահագործման և ձմեռային պահպանման համար հատկացվել է 39.3 մլն. դրամ, որից 33.8 մլն. դրամը հատկացվել է 29.3 կմ երկարությամբ ճանապարհների ընթացիկ պահպանման ու շահագործման համար, իսկ 5.5 մլն. դրամը` 47կմ ձմեռային պահպանության համար:
Ըստ նրա` վերահսկողություն է իրականացվում Տ-3-50 «Արմավիր-Նորապատ-Մրգաշատ-Արևիկ-Երասխահուն» 18.9 կմ երկարությամբ մարզային նշանակության ճանապարհի հիմնանորոգման աշխատանքների և Տ-3-13 «Տ-3-51 - Բամբակաշատ» նորոգվող 0.8կմ հատվածի վրա:
Մարզպետն անդրադարձավ նաև գյուղատնտեսության ոլորտին`նշելով, որ 2016թ. հունվարի 1-ի դրությամբ կազմակերպվել և համակարգվել է համայնքներում առկա անասնագլխաքանակի համատարած հաշվառման աշխատանքները, որոնց համաձայն մարզում առկա է 60382 գլուխ խոշոր և 102065 մանր եղջերավոր կենդանի, ինչպես նաև 25444 խոզ և 900959 թռչուն:
Նրա խոսքով` հաշվետու ժամանակահատվածում համակարգվել է մարզում գործող <<Ոռոգում - Ջրառ>> ՓԲԸ-ի երկու մասնաճյուղերի և 7 ՋՕԸ-ի գործունեությունը: 252,97 կմ միջտնտեսային, 4981,1 ներտնտեսային ցանցերը, 364 խորքային հորերը և 70 պոմպակայանները պատրաստ են եղել ջրամատակարարմանը, որը սկսվել է ս/թ ապրիլի 1-ից:
Մարզպետ Աշոտ Ղահրամանյանի փոխանցմամբ ուսումնասիրվել և համակարգվել են համայնքներում գյուղատնտեսական աշխատանքների նախապատրաստման, գարնանացանի իրականացման աշխատանքները: ՀՀ կառավարության համապատասխան որոշումներով մարզի հողօգտագործողներին որպես աջակցություն տրամադրվել է 80,0 տոննա գարնանացան գարու, 2,54 տոննա առվույտի սերմացու, որը համապատասխանաբար բաշխվել է 35 համայնքի 240 շահառուների, որոնք 501,55 հա-ի վրա կատարել են ցանքսի աշխատանքներ: Կառավարության աջակցությամբ տրամադրվել է նաև 6000 տոննա ազոտական պարարտանյութ, 200 տոննա ֆոսֆորական պարարտանյութ, 200 տոննա կալիումական պարարտանյութ, ինչպես նաև 550000 լիտր դիզելային վառելանյութ:
Մարզպետն անդրադարձավ նաև սույն թվականի մայիսի 12-ին, 18-ին, 23-ին, հունիսի 4-ին և 5-ին տեղի ունեցած կարկտահարությանը` նշելով, որ մարզի թվով 26 համայնքներին պատկանող 5254,6հա պտղի, խաղողի, բանջարեղենի և բոստանի տարածությունները գույքագրվել են համայնքային հանձնաժողովների կողմից և ամփոփված տվյալները ներկայացվել են ՀՀ կառավարություն: Կարկտահարության հասցրած վնասները մեղմելու նպատակով, ըստ նրա, մարզում տեղակայվելու է 12 հակակարկտային կայան (Տանձուտ` 4, Արևիկում` 1, Եղեգնուտ` 3 , Արտաշարում` 2 և Արգինայում` 2):
Անդրադառնալով աառողջապահության ոլորտին` մարզպետ Աշոտ Ղահրամանյանը մասնավորապես ընդգծեց, որ 2016թ. առաջին կիսամյակում մարզում համաճարակային իրավիճակը եղել է կայուն և վերահսկելի: Հաշվետու ժամանակահատվածում մարզում գրանցվել է 1125 ծնունդ, բնական աճը կազմել է՝ 316, մանկական մահացությունը կազմել է՝ 3.5 պրոմիլե: 2016թ. գլոբալ բյուջեով մարզի առողջապահական հաստատություններին հատկացված է 2,974,340,456 ՀՀ դրամ, որից համամասնորեն առ 11.07.2016թ. դրությամբ, ֆինանսավորվել է 1,494,501,500 ՀՀ դրամ:
Խոսելով սեցիալական ոլորտին վերաբերող հարցերի շուրջ` մարզպետը նշեց, որ սոցիալական ապահովության բնագավառում մարզի զարգացման առաջնային նպատակներից շարունակում է մնալ սոցիալական ծառայությունների մատչելիությունը բոլոր խոցելի խմբերի համար, ինչպես նաև սպասարկման որակի բարձրացումը:
Ըստ նրա` 2016թ. հունիսի 1-ի դրությամբ փաստագրված ընտանիքների թիվը 7154 է, որոնցից նպաստառու են 4744-ը: Արմավիրի մարզային սոցիալական ապահովագրության տարածքային կենտրոններում հաշվառված են 39547 կենսաթոշակառուներ: Հաշվետու ժամանակահատվածում ավանդի փոխհատուցման գումար ստացած ընտանիքների թիվը մարզում կազմել է 105:
Մարզպետի տեղեկացմամբ` մարզի զբաղվածության տարածքային գործակալություններում հաշվառված են աշխատանք փնտրող 6832 մարդ, որոնցից գործազուրկի կարգավիճակ են ստացել 5317-ը, աշխատանք փնտրող անձանցից աշխատանքի է տեղավորվել 152-ը:
ՀՀ Արմավիրի «Մարզպետարանի կողմից իրականացվող ծրագրերի այլ նպաստներ բյուջեից» հոդվածով հաշվետու ժամանակաշրջանում դրամական օգնություն է հատկացվել 237 ընտանիքների` 10 մլն 665 հազ. դրամ գումարի չափով: Առողջարանային և վերականգնողական բուժման ուղեգրեր են տրամադրվել 97 հաշմանդամների:
Մարզպետ Աշոտ Ղահրամանյանը խոսեց նաև կրթության, մշակույթի, սպորտի, ոլորտներում, արտաքին կապերի բնագավառում իրականացված աշխատանքների, ներմարզային խնդիրների, դրանց լուծման հնարավոր ուղիների ու նախատեսվող ծրագրերի մասին, պատասխանեց նաև լրագրողներին հետաքրքրող հարցերին: