Արմավիրի մարզպետի աշխատակազմ

Ինձ շատ հոգեհարազատ բնագավառի հարգելի գործընկերներ, ընդունեք իմ ջերմ շնորհավորանքները Բուժաշխատողի օրվա կապակցությամբ։ Բժշկի մասնագիտությունն իսկապես եղել է, կա և կշարունակվի որակվել որպես մեծագույն նվիրում պահանջող և մարդասիրական մասնագիտություն։ Մասնագիտություն, որն ի զորու է հրաշքներ գործել, ընդհուպ մինչև երկրորդ կյանք պարգևել մարդուն։

Ես խոնարհվում եմ բոլոր այն բժիշկների վաստակի առջև, ովքեր, բարձր պահելով մասնագիտական որակավորումը, մեծագույն նվիրումով են իրականացրել և շարունակում են իրականացնել իրենց աստվածահաճո առաքելությունը։

Հավատացած եղեք, որ այն հոգատարությունն ու սերը, որը դրսևորվում է բուժհաստատությունում սպիտակ խալաթ կրող յուրաքանչյուր անձի կողմից, միշտ փոխադարձվում է ամենաանկեղծ ու մարդկային վերաբերմունքով: Եվ ավելի մեծ ու իրական գնահատանք բժշկի համար կարծում եմ գոյություն չունի:

Սակայն բոլորիս է հայտնի, որ բժշկի գործունեությունը չի սահմանափակվում ամենօրյա մասնագիտական առաքելությամբ։ Եվ այժմ պետական մակարդակով բավականին լուրջ ծրագրեր են իրականացվում նաև բնակչությանը որակյալ և մատչելի բժշկական ծառայություններով ապահովելու, բուժհաստատություններն արդիականացնելու ուղղությամբ։

Այս բարեփոխումները, զուգորդվելով բժշկի մասնագիտական բարձր որակավորման և մարդկային հատկանիշների հետ, համոզված եմ, որ միայն կնպաստեն ոլորտում իրական հաջողություններ գրանցելուն և առաջընթացին:

Հարգարժան բուժաշխատողներ, թույլ տվեք ևս մեկ անգամ շնորհավորել ձեզ մասնագիտական օրվա առթիվ՝ ցանկանալով ամուր կամք և անձնական երջանկություն: Եվ թող ձեր նվիրական աշխատանքը միշտ հաջողությամբ պսակվի:
Ամենայն բարիք ձեզ և ձեր ընտանիքներին:

Լավագույն ցանկություններով՝
Արմավիրի մարզպետ Գագիկ Միրիջանյան