Տեղեկատվական կենտրոն
Նորություններ
Մարզպետն ընդունել է արտիմետցի ըմբշամարտուհուն
08.08.2018
ՀՀ Արմավիրի մարզպետ Գագիկ Միրիջանյանն այսօր ընդունել է արտիմետցի ըմբշամարտուհի Անի Առաքելյանին և նրա մարզչին` Գոռ Աբգարյանին: Հանդիպմանը ներկա է գտնվել նաև մարզպետարանի աշխատակազմի ղեկավարի պաշտոնակատար Վարդան Վարդազարյանը:
Մարզպետին տեղեկացվել է, որ արդեն 4 տարի է Արտիմետ գյուղում գործում է Նորայր Մուշեղյանի անվան մարզադպրոցի մասնաճյուղի ըմբշամարտի աղջիկների խումբը, որն առաջինն է Հայաստանում: Մարզչի փոխանցմամբ աղջիկներն այս տարիներին բազում հաղթանակներ են ունեցել Հայաստանում և արտերկրում:
Մարզուհիներից Անի Առաքելյանն արդեն համարվում է Հայաստանի եռակի չեմպիոն: 2015 թվականին էլ նա մասնակցել է Ֆրանսիայի Բագնոլետ քաղաքում կայացած 22-րդ միջազգային մրցաշարին` ելույթ ունենալով 2 տարիքային խմբերում և մինչև 35 կգ քաշային կարգում նվաճելով 2 տիտղոս:
Մարզպետ Գագիկ Միրիջանյանը բարձր է գնահատել մարզաձևում Անի Առաքելյանի և մյուս ըմբշամարտուհիների հաջողությունները` այդ ամենում կարևորելով մարզիչ Գոռ Աբգարյանի դերակատարումը: Հետագա մրցաշարերին մասնակցելու և ընթացիկ խնդիրները լուծելու հարցում նա իր աջակցությունն է հայտնել մարզչին` ընդգծելով, որ պետք է անել ավելին` առավել լուրջ հաղթանակներ գրանցելու համար: