Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Համբարձում Մաթևոսյանի մոտ տեղի է ունեցել քաղաքացիների հերթական ընդունելությունը
25.10.2018
ՀՀ Արմավիրի մարզպետ Համբարձում Մաթևոսյանի մոտ այսօր տեղի է ունեցել քաղաքացիների հերթական ընդունելությունը: Ընդունելությանը ներկա են գտնվել նաև մարզպետի տեղակալները և կառուցվածքային ստորաբաժանումների պատասխանատուները քաղաքացիների կողմից ներկայացվող հարցերը քննարկելու, ինչպես նաև համապատասխան լուծումներ առաջարկելու նպատակով:
Ընդունելությանը նախապես գրանցված 23 քաղաքացիներից մասնակցել են 20-ը:
Քաղաքացիները մարզպետին դիմել են հիմնականում դրամական աջակցության, առողջական խնդիրների լուծման, բնակարանի գազաֆիկացման, բնակելի տան տանիքի վերանորոգման և ուսման վարձի վճարման աջակցության խնդրանքով: Եղել է նաև թաղամասը խմելու ջրով ապահովելու, այգեգործական ընկերության հետագա կարգավիճակի հետ կապված խնդիրների լուծմանը հնարավոր աջակցություն ցուցաբերելու խնդրանքներ:
Ընդունելությանը մասնակցած քաղաքացիներից երկուսն էլ մարզպետին դիմել են ընթացիկ տարում տեղի ունեցած կարկտահարության հետևանքով խաղողի այգուն պատճառված վնասի և ոռոգման ջրի անբավարար մատակարարման հետևանքով այգու չորացման համար փոխհատուցում ցուցաբերելու խնդրանքով:
Մարզպետ Համբարձում Մաթևոսյանը` լսելով քաղաքացիների բոլոր խնդիրները և խնդրանքները, դրանք տեղում քննարկել է ոլորտային պատասխանատուների հետ, նրանց հանձնարարել է անհատապես զբաղվել յուրաքանչյուր քաղաքացու խնդրի լուծմամբ: Այնուհետև քաղաքացիներին տվել է համարժեք պատասխաններ և պարզաբանումներ` վստահեցնելով, որ բոլորի խնդիրներին հնարավորության սահմաններում և օրինական դաշտում կտրվեն համապատասխան լուծումներ, իսկ գրավոր դիմումներին` գրավոր պատասխաններ:
