Տեղեկատվական կենտրոն
Նորություններ
Քննարկվել են տնտեսվարող սուբյեկտների հասարակական զուգարանների սանիտարական վիճակի բարելավմանն ուղղված հարցեր
10.01.2019
ՀՀ Արմավիրի մարզպետի տեղակալ Կարեն Գրիգորյանն այսօր խորհրդակցություն է անցկացրել մարզի գազալցակայանների և բենզալցակայանների պատասխանատուների մասնակցությամբ: Խորհրդակցությանը ներկա են գտնվել նաև մարզպետարանի գլխավոր քարտուղարի պաշտոնակատար Վարդան Վարդազարյանը, քաղաքաշինության վարչության պետի պաշտոնակատար Աշոտ Հովհաննիսյանը:
Խորհրդակցության ընթացքում քննարկվել է նախորդ տարվա ավարտին մարզպետարանի և առողջապահության տեսչության կողմից մարզի 55 գազալցակայան և 36 բենզալցակայան կատարած այցերի և ստուգումների արդյունքում հայտնաբերված թերությունները: Մասնավորապես անդրադարձ է եղել տվյալ հաստատություններում առկա հասարակական զուգարանների առկայությանը և նրանց սանիտարական վիճակին:
Կարևորելով հասարակական զուգարանների սանիտարական վիճակի բարելավումը և դա համարելով անհրաժեշտ նախապայման մարզում զբոսաշրջության զարգացման համար` փոխմարզպետ Կարեն Գրիգորյանը խորհրդակցությանը ներկա տնտեսվարող սուբյեկտների պատասխանատուներին հորդորել է սեղմ ժամկետում ապահովել Առողջապահության նախարարի` «Հասարակական զուգարաններին ներկայացվող հիգիենիկ պահանջները» սահմանող համապատասխան հրամանով նախատեսված սանիտարական կանոնները և նորմերը: