Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետը խորհրդակցություն է անցկացրել համայնքապետերի մասնակցությամբ
23.01.2019
ՀՀ Արմավիրի մարզպետ Համբարձում Մաթևոսյանն այսօր խորհրդակցություն է անցկացրել համայնքապետերի մասնակցությամբ:
Օրակարգային հարցերի շրջանակում մարզպետը հիմնականում անդրադարձել է սեփական եկամուտների հավաքագրման ցուցանիշի բարելավմանը` անընդունելի համարելով այն հանգամանքը, որ բնական աղետներից տուժած համայնքների հավաքագրման ցուցանիշը շատ դեպքերում գերազանցում է մյուս համայնքների կատարողականի ապահովումը: Հավաքագրումների մակարդակը բարելավելու համար նա համայնքապետերին առաջարկել է անհատական աշխատանք տանել ազգաբնակչության շրջանում:
Մարզպետը համայնքների ղեկավարների ուշադրությունը հրավիրել է նաև աղբահանության գործընթացի կազմակերպման վրա` հորդորելով ակտիվացնել աշխատանքներն այդ ուղղությամբ և գործնական միջոցներ ձեռք առնել համայնքներն աղբից մաքրելու հարցում:
Համբարձում Մաթևոսյանն անդրադարձել է նաև գարնան նախապատրաստական աշխատանքներին` առաջարկելով դրանք իրականացնել մարզպետարանի գյուղատնտեսության և բնապահպանության վարչության և ՋՕԸ-երի հետ համագործակցության արդյունքում: Նա միևնույն ժամանակ տեղեկացրել է, որ Սակավաջրության ռիսկերի կանխման հրատապ միջոցառումների ծրագրով մինչև ոռոգման շրջանի մեկնարկը մարզում նախատեսվում է հորատել 23 նոր խորքային հոր, ևս 14-ն էլ վերականգնել:
Խորհրդակցության ընթացքում ի թիվս այլ հարցերի քննարկվել են նաև համայնքներում հրատապ համարվող մի շարք խնդիրներ, ներկայացվել են լուծման հնարավոր տարբերակներ:
Ամփոփելով խորհրդակցությունը` մարզպետ Համբարձում Մաթևոսյանն ընդգծել է, որ հանրապետությունում մարզի դիրքերը պետք է բարելավվեն բոլոր ոլորտներում` այդ համատեքստում կարևորելով քաղաքային և գյուղական համայնքների գործունեության արդյունավետության բարձրացումն ու անմիջական կապն ազգաբնակչության հետ:
