Արմավիրի մարզպետի աշխատակազմ

ՀՀ Արմավիրի մարզպետ Համբարձում Մաթևոսյանն այսօր այցելել է Հայաստանի մանուկներ հիմնադրամի (COAF) երևանյան գրասենյակ, հանդիպում ունեցել հիմնադրամի վարչական բաժնի ղեկավար Ինեսա Գրիգորյանի, գործադիր տնօրենի պաշտոնակատար Կորյուն Խաչատուրյանի, Ծրագրերի ղեկավար Անահիտ Հակոբյանի և հիմնադրամի հայաստանյան ներկայացուցիչ, գլխավոր խորհրդական Էրիկ Գյուլազյանի հետ:

Հանդիպման ընթացքում Համբարձում Մաթևոսյանին են ներկայացվել հիմնադրամի կողմից վերջին 15 տարիներին Արմավիրի մարզում իրականացված համապարփակ զարգացման ծրագրերը:

Մասնավորապես նշվել է, որ մարզի 13 համայնքում (Քարակերտ, Լեռնագոգ, Դալարիկ, Մյասնիկյան, Հացիկ, Վանանդ, Գետաշեն, Շենիկ, Բագարան, Բաղրամյան, Երվանդաշատ, Սարդարապատ, Արգինա)այս տարիներին իրականացված ծրագրերն ուղղված են եղել առողջ, կրթված, սոցիալապես պատասխանատու և տնտեսապես ակտիվ գյուղական համայնքների զարգացմանը:

Ներկայացվել են նաև մարզում համայնքային ենթակառուցվածքների զարգացմանն ուղղված ծրագրերը, որոնց շրջանակում հիմնադրամը կապիտալ վերանորոգել է 8 դպրոց, 9 բուժհաստատություն, 3 մանկապարտեզ և հիմնել 7 խաղահրապարակ, 6 ստեղծագործարան, 7 դպրոցական ճաշարան և ատամակայան:

Հաշվի առնելով տարիների ընթացքում իրականացված բազմաոլորտ ծրագրերը և ունեցած հաջողությունները` պայմանավորվածություն է ձեռք բերվել համագործակցությունը շարունակելու և նոր ձեռնարկներ իրականացնելու վերաբերյալ: