Տեղեկատվական կենտրոն
Նորություններ
Համբարձում Մաթևոսյանն ընդունել է Նալբանդյան համայնքի ղեկավարի թեկնածուներին
29.01.2019
Փետրվարի 17-ին Արմավիրի մարզի յոթ համայնքում տեղի կունենա տեղական ինքնակառավարման մարմինների ընտրություն. հինգ համայնքում ընտրելու են համայնքի ղեկավարի, իսկ երկուսում` ավագանու անդամների:
Նշված հինգ համայնքների թվում է նաև Նալբանդյան համայնքը, որտեղ համայնքի գործող ղեկավարի հետ իրենց թեկնածությունն են առաջադրել ևս 4-ը: Այսօր նրանց հետ հանդիպել և ընտրական գործընթացների վերաբերյալ իր դիրքորոշումն է ներկայացրել մարզպետ Համբարձում Մաթևոսյանը` բացառելով իր, մարզպետարանի կամ այլ մարմինների ու անձանց` օրենքի շրջանակներից դուրս միջամտությունն այդ գործընթացին. <<Ամենայն հարգանքով ձեր և համայնքի բնակչության հանդեպ` ասեմ, որ ես կողմնակալ վերաբերմունք չունեմ որևէ թեկնածուի նկատմամբ, բոլորդ ինձ համար հավասար հնարավորությունների տեր անձիք եք, և սպասվող ընտրություններում ձեր հաջողությունը պայմանավորված է լինելու միայն ու միայն բնակիչների` ձեր օգտին տված քվեով:
Մի բանում վստահ եղեք, որ Հայաստանի Հանրապետությունում այսուհետ գերակա է միայն օրենքը, և այդ օրենքի երաշխավորն այս մարզում ես եմ: Ոչ ոք թող չփորձի իրեն վեր դասել օրենքից և անհիմն հայտարարություններ թույլ տալ>>:
Հանդիպման ավարտին մարզպետը կոչ է արել համայնքի ղեկավարի թեկնածուներին համայնքում պահպանել սիրո և հանդուրժողականության մթնոլորտը` օրենքի շրջանակներում ապահովելով նախընտրական ողջ գործընթացը: