Տեղեկատվական կենտրոն
Նորություններ
Մարզպետ Համբարձում Մաթևոսյանն այցելել է Շահումյանի միջնակարգ դպրոց
01.02.2019
ՀՀ Արմավիրի մարզպետ Համբարձում Մաթևոսյանն այսօր այցելել է Շահումյան համայնքի միջնակարգ դպրոց` ծանոթանալու շենքային պայմաններին, վերջին ամիսներին իրականացված աշխատանքներին, ապա մասնակցել Բանակի օրվան նվիրված միջոցառմանը:
Դպրոցի տնօրեն Լենա Խաչատրյանը Համբարձում Մաթևոսյանին նախ ներկայացրել է իր իսկ աջակցությամբ 4 մլն 72 հազար դրամի շրջանակներում լոկալ ջեռուցման համակարգի ներդրման ուղղությամբ իրականացված աշխատանքները` ընդգծելով, որ համեմատաբար քիչ գումար ծախսելով այժմ դպրոցում կարողանում են ապահովել 20-21 աստիճան ջերմություն:
Շրջայցի ընթացքում մարզպետին ներկայացվել են նաև դպրոցի տնտեսած միջոցների հաշվին համակարգչային և մաթեմատիկա առարկայի համար բացված դասասենյակները և կրթօջախի պայմանների բարելավմանն ուղղված հետագա ծրագրերը:
Այնուհետև մարզպետ Համբարձում Մաթևոսյանը ներկա է գտնվել Հայոց բանակի կազմավորման 27-րդ տարեդարձին նվիրված միջոցառմանը, որի ընթացքում աշակերտները ներկայացրել են հայ ժողովրդի անցյալի ու ներկայի պատմական դրվագները, հերոսական ուղին` այդ ամենը զուգորդելով հայրենասիրական երգ ու պարով, ասմունքով:
Ողջունելով ներկաներին և շնորհակալություն հայտնելով միջոցառման կազմակերպիչներին, մասնակիցներին` մարզպետը շնորհավորել է բոլորին Բանակի օրվա առթիվ` նշելով. <<27 տարի առաջ դժվարին պայմաններում ձևավորված մեր բանակը բազում խոչընդոտներ է հաղթահարել` պատվով կատարելով իր առջև դրված ցանկացած խնդիր:
Ավարայրի ճակատամարտից մինչև Սարդարապատի հերոսամարտ, Արցախյան պատերազմից մինչև Ապրիլյան քառօրյա և այսօր էլ մենք ողջ ազգով կանգնած ենք Հայոց բանակի կողքին` պատրաստ աջակցելու ցանկացած հարցում>>:
Ի դեմս միջոցառմանը մասնակից մերօրյա հերոսներ Գևորգ Մանուկյանի և Գոռ Դարմանյանի` մարզպետն իր երախտագիտությունն է հայտնել հանուն հայրենիքի պաշտպանության խիզախորեն մարտնչած բոլոր տղաներին, նրանց ընտանիքներին և գլուխ խոնարհել մարտի դաշտում ընկած հերոսների հիշատակի առջև: