Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Համբարձում Մաթևոսյանը շաբաթօրյակի շրջանակում այցելել է համայնքներ
23.03.2019
ՀՀ Արմավիրի մարզպետ Համբարձում Մաթևոսյանը «Մաքուր Հայաստան» շաբաթօրյակի շրջանակում այսօր այցելել է Ծիածան, Ծաղկունք համայնքներ` հետևել և մասնակցություն ունեցել իրականացվող համապետական առաջին շաբաթօրյակի աշխատանքներին:
Կարևորելով մաքրությունն ապրելակերպ դարձնելը, և տարածքները չաղտոտելու մշակույթ ձևավորելը` լրագրողների հետ զրույցում Համբարձում Մաթևոսյանն ընդգծել է, որ միայն շաբաթօրյակների ընթացքում չպետք է իրականացնել ընդհանուր մաքրման աշխատանքներ, այլ այդ գործընթացն ազգաբնակչության առօրյայի բաղկացուցիչ մասը պետք է հանդիսանա:
«Նախորդ երկու մարզխորհուրդների նիստերի ժամանակ թեմայի շուրջ զրուցել եմ համայնքապետերի հետ, հորդորել նրանց բացատրական աշխատանքներ տանել բնակչության շրջանում: Իհարկե, մեկ շաբաթօրյակի ընթացքում հնարավոր չէ մարզն ամբողջությամբ մաքրել աղբից, բայց մեր բնակիչներն էլ պետք է այդ ուղղությամբ հետևողական լինեն և անմիջական մասնակիցը դառնան իրենց շրջապատող միջավայրը մաքրելու գործընթացին»,-իր խոսքում նշել է մարզպետը:
Համբարձում Մաթևոսյանը նաև տեղեկացրել է, որ շաբաթօրյակին կմասնակցեն տարբեր կառույցներ ներկայացնող շուրջ 15 հազար աշխատակիցներ, այդ թվում` դպրոցականներ: Մաքրման և բարեկարգման աշխատանքների կազմակերպման նպատակով կներգրավվի 217 միավոր տեխնիկա` ինքնաթափեր, բարձիչներ, էքսկավատորներ, կցասայլեր:
Հավելենք, որ շաբաթօրյակի շրջանակում մարզպետը կայցելի նաև Արմավիրի և Բաղրամյանի տարածաշրջանների մի շարք համայնքներ:
