Արմավիրի մարզպետի աշխատակազմ

ՀՀ կրթության տեսչական մարմնի կողմից Արմավիրի Վարդան Բախշյանի անվան N2, Արմավիրի N8 հիմնական և Արմավիրի միջնակարգ դպրոցներում իրականացված ստուգումների արդյունքում հայտնաբերվել են կրթության բնագավառը կարգավորող ՀՀ օրենսդրության պահանջների խախտումներ:

Հայտնաբերված խախտումների հետևանքները և թերությունները վերացնելու ուղղությամբ ձեռնարկվող միջոցառումների շրջանակում այսօր ՀՀ Արմավիրի մարզպետ Համբարձում Մաթևոսյանը հանդիպում-քննարկում է ունեցել վերը նշված ուսումնական հաստատությունների տնօրենների հետ:

Անընդունելի համարելով ուսումնական հաստատություններում ցանկացած բնույթի խախտում` մարզպետը նշել է, որ անհրաժեշտության դեպքում պատրաստ է աշխատել շաբաթը 7 օր և 24 ժամ` դպրոցներում տիրող իրավիճակը շտկելու համար` վստահեցնելով, որ այդ հարցում իրեն ոչինչ չի խոչընդոտում: Նա նշել է, որ կրթության ոլորտում առկա խնդիրներն իր համար առաջնային են այլ ոլորտներում առկա խնդիրների համեմատությամբ, քանի որ հենց այս ոլորտով է պայմանավորված մյուս բոլոր ոլորտների զարգացումը:

<<Եթե մի շարք ոլորտներում մարզի ցուցանիշներն ինձ չեն գոհացնում և դա ինչ-որ տեղ հասկանալի է և ժամանակի խնդիր է, ապա ինձ համար անհասկանալի և անընդունելի է կրթության ոլորտում տիրող իրավիճակը, խախտումներն ու չարաշահումները, որոնց վերջնական կարգավորման հարցով ես հենց այսօր կզբաղվեմ>>,- իր խոսքում ընդգծել է մարզպետը` կարևորելով կրթադաստիարակչական գործընթացի բարելավումը` կիրթ սերունդ ունենալու համար:

Տնօրենների պարզաբանումները լսելուց հետո մարզպետ Համբարձում Մաթևոսյանն ամփոփել է քննարկումը` հանձնարարելով հնարավորինս սեղմ ժամկետներում վերացնել տեսչական մարմնի կողմից արձանագրված խախտումների հետևանքներն ու թերությունները:

Հավելենք, որ թույլ տված խախտումների մասով վերոնշյալ դպրոցների տնօրենների նկատմամբ ՀՀ Արմավիրի մարզպետի որոշմամբ կկիրառվի կարգապահական տույժ: