Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետ Համբարձում Մաթևոսյանն անակնկալ այցով եղել է Վաղարշապատի թիվ 9 հիմնական դպրոցում
18.06.2019
ՀՀ Արմավիրի մարզպետ Համբարձում Մաթևոսյանն այսօր անակնկալ այցով եղել է Վաղարշապատի թիվ 9 հիմնական դպրոցում` ծանոթանալու ուսումնադաստիարակչական գործընթացի իրականացման համար առկա պայմաններին:
Կրթօջախի տնօրեն Մարետա Սամվելյանի ուղեկցությամբ մարզպետը շրջել է դպրոցում, հետաքրքրվել ուսումնական գործընթացով, ընթացիկ և առաջնային լուծում պահանջող խնդիրներով:
Տնօրենը մարզպետին տեղեկացրել է, որ դպրոցը շահագործման է հանձնվել 1978 թվականին և մինչ այժմ չի վերանորոգվել: 2015 թվականին մարզի հրատապ խնդիրների լուծման ծրագրի շրջանակում փոխվել է միայն դպրոցի 7 մասնաշենքից 3-ի տանիքը: Ըստ նրա` 700 աշակերտ ունեցող կրթօջախի համար բազում խնդիրների շարքում առաջնային է 30 տարի չշահագործվող մարզադահլիճի վերանորոգումը:
Կարևորելով մարզադահլիճի շահագործումը` մարզպետ Համբարձում Մաթևոսյանը, այնուամենայնիվ, կրթօջախի համար առաջնային է համարել նախ փոխել տանիքը և պատուհանները, ապա մտածել մյուս խնդիրների լուծման մասին: Նա վստահեցրել է, որ այդ հարցը կքննարկի մարզպետարանի համապատասխան աշխատակիցների հետ` փորձելով գտնել լուծման հնարավոր տարբերակներ: Մարզպետը տնօրենի հետ քննարկել է նաև դպրոցի բակի բարեկարգման հարցը:
