Տեղեկատվական կենտրոն
Նորություններ
Մարզպետն այցելել է մի շարք համայնքներ
25.06.2019
ՀՀ Արմավիրի մարզպետ Համբարձում Մաթևոսյաննը մարզպետարանի ոլորտային պատասխանատուների ուղեկցությամբ այսօր այցելել է Կողբավան, Բագարան Երվանդաշատ, Ամասիա և Նալբանդյան համայնքներ:
Համայնքային այցի շրջանակում մարզպետը հանդիպում-քննարկումներ է ունեցել բնակչության հետ, ծանոթացել համայնքներում իրականացված ներդրումային ծրագրերին, ներհամայնքային խնդիրներին` ներկայացնելով դրանց լուծման հնարավոր տարբերակները:
Կողբավան համայնքում Համբարձում Մաթևոսյանն այցելել է «Արմեն Ֆրութ» ընկերությանը պատկանող պիստակի այգի: Մարզպետին ներկայացվել է այգու հիմնման ներդրումային ծրագիրը, որն այժմ իրականացվում է 11 հեկտար հողատարածքի վրա, սակայն նպատակ կա այն ընդլայնելու` հասցնելով 1000 հեկտարի:
Կողբավան համայնքի ղեկավարը մարզպետին տեղեկացրել է, որ համայնքային բյուջեով ընթացիկ տարում նախատեսված է համայնքի կենտրոնական ճանապարհի 1 կմ հատվածի ասֆալտապատում, իսկ սուբվենցիոն ծրագրով` խմելու ջրագծի անցկացում:
Երվանդաշատ համայնքում էլ մարզպետը ծանոթացել է գարնանային վարարումների հետևանքով Արաքս գետի փլուզված ափապատնեշին և վերականգնման ուղղությամբ նախատեսվող աշխատանքներին:
Ամասիա և Նալբանդյան համայնքներում էլ Համբարձում Մաթևոսյանն այցելել է ծիրանի այգիներ, հետևել բերքահավաքի ընթացքին, զրուցել այգետերերի, արտահանողների և բերքահավաքն իրականացնողների հետ: Նա հետաքրքրվել է ստացված բերքի ծավալով և իրացման հետ կապված հարցերով: