Տեղեկատվական կենտրոն
Նորություններ
Քննարկվել են պատմամշակութային հուշարձանների պահպանմանը, օգտագործմանն ու հանրահռչակմանը վերաբերող հարցեր
07.02.2020
ՀՀ կրթության, գիտության, մշակույթի և սպորտի նախարարության կողմից պատմամշակութային հուշարձանների պահպանման, օգտագործման և հանրահռչակման նպատակով իրականացվող իրազեկման արշավի շրջանակում ԻԿՕՄ-Հայաստանի ազգային կոմիտեի և ՀՀ Արմավիրի մարզպետարանի կրթության, մշակույթի և սպորտի վարչության համագործակցությամբ այսօր տեղի է ունեցել հանդիպում-քննարկում, որին մասնակցել են Արմավիրի մարզի համայնքների ղեկավարներ, հանրակրթական ուսումնական հաստատությունների ուսուցիչներ և աշակերտներ:
Իրազեկման արշավի նպատակն էր ոչ պաշտոնական քննարկումների ճանապարհով լայն հասարակության ուշադրությունը սևեռել պատմամշակութային ժառանգության ոլորտում առկա խնդիրների, անելիքների, մարտահրավերների վրա, և թե ինչպես տարբեր իրավիճակներում գտնել լուծումներ, հանդես գալ նախաձեռնություններով:
Հանդիպումը վարել է ԿԳՄՍ նախարարության հուշարձանների պահպանության գործակալության Հուշարձանների պատմական միջավայրի պահպանության բաժնի պետ Սուրեն Շաքարյանը, ով խոսելով հայ ժողովրդի պատմամշակութային հզոր ժառանգության մասին՝ ներկայացրել է նրա պահպանության, օգտագործման և հանրահռչակման հետ կապված խնդիրները: Միևնույն ժամանակ ընդգծվել է փոխհամագործակցության միջոցով հնարավորինս արդյունավետ կերպով մշակութային արժեքների անխափան պահպանման և սերունդներին փոխանցման կարևորությունը: