Արմավիրի մարզպետի աշխատակազմ

ՀՀ Արմավիրի մարզպետ Համբարձում Մաթևոսյանը ՌԴ անվտանգության դաշնային ծառայության սահմանապահ վարչության Արմավիրի սահմանապահ ջոկատում բարձրաստիճան սպայակազմի, հանրապետական գործադիր մարմինների Արմավիրի տարածքային կառույցների ղեկավարների, Արմավիրի քաղաքապետի և այլ պաշտոնյաների հետ այսօր ներկա է գտնվել նորակոչիկների երդման հանդիսավոր արարողությանը:

Մարզպետը ողջունել է միջոցառման մասնակիցներին և բարի ծառայություն մաղթել նորակոչիկներին` ասելով. <<Շնորհավորում եմ ձեզ կյանքի կարևորագույն իրադարձության՝ երդման արարողության կապակցությամբ: Երդում տալով` դուք կանգնում եք հայրենիքի պաշտպանների շարքը: Այսօր դուք պատասխանատվություն եք կրում երկրի, ձեր քաղաքի ու գյուղի ճակատագրի համար:

Երդման արարողությունն ունի պատմական խոր արմատներ և կրելով որոշակի փոփոխություններ՝ պահպանվել է մինչև մեր օրերը: Այն մարդիկ, ովքեր ծառայել կամ ծառայում են, ովքեր որևէ կերպ կյանքում կապ են ունեցել Հայրենիքի պաշտպանի վեհ մասնագիտության հետ, իրենց հիշողության մեջ պահում են այդ օրը ողջ կյանքում:

Դուք կանգնած եք իսկապես լուրջ փորձության առջև, և ես վստահ եմ, որ կհաղթահարեք այն: Ցանկանում եմ, որ ուսումնառության մեջ լինեք համառ, քանզի ժամանակակից բանակը բարձր պրոֆեսիոնալիզմ և լուրջ գիտելիքներ է պահանջում:

Ուստի բոլորիդ ցանկանում եմ խաղաղ և անփորձանք ծառայություն: Դուք այսօրվանից պաշտպանելու եք այն փոքրիկ, բայց սուրբ հողակտորը, որը կոչվում է Հայրենիք: Համոզված եմ, որ պատվով կկատարեք ձեր պարտքը և հավատարիմ կմնաք ձեր պապերի սրբազան ուխտին` անառիկ պահելով մեր հայրենիքի սահմանները:
Ձեզ բարի ծառայություն:
Աստված ձեզ պահապան>>:

Երդմնակալության արարողության ավարտից հետո մարզպետ Համբարձում Մաթևոսյանը, զորամասի հրամանատարական կազմը և միջոցառմանը մասնակից հյուրերը լուսանկարվել են նորակոչիկների հետ` հավերժացնելով նրանց կյանքի կարևորագույն իրադարձություններից մեկը խորհրդանշող օրը: