Տեղեկատվական կենտրոն
Նորություններ
Մարզպետը մասնակցել է ԱԻՆ Արմավիրի մարզային փրկարար վարչությունում կազմակերպված հանդիսավոր միջոցառմանը
04.09.2020
Արտակարգ իրավիճակների աշխատակցի օրվա կապակցությամբ ՀՀ Արմավիրի մարզպետ Համբարձում Մաթևոսյանն այսօր այցելել է ԱԻՆ Արմավիրի մարզային փրկարար վարչություն` մասնակցելու օրվա առթիվ կազմակերպված հանդիսավոր միջոցառմանը:
Մասնագիտական օրվա առթիվ շնորհավորելով մարզային փրկարար վարչության աշխատակիցներին` մարզպետն ընդգծել է, որ նրանք իրենց սրտացավ ու արհեստավարժ աշխատանքի շնորհիվ մեծ ծառայություն են մատուցում մեր երկրին ու ժողովրդին` հաճախ վտանգելով սեփական կյանքը: «Դուք միշտ բոլորիս հետ եք, բոլորիս կողքին, և հավատացեք, որ ձեր անձնուրաց աշխատանքը մեծ գնահատանքի է արժանանում: Շնորհակալ ենք ձեր ծառայության համար»,- ամփոփելով իր խոսքը` նշել է մարզպետ Համբարձում Մաթևոսյանը:
Փրկարարների նկատմամբ մարզպետն իր վերբերմունքն արտահայտել է նաև պատվոգրերի և շնորհակալագրերի տեսքով` մասնագիտական և ծառայողական պարտականությունները բարեխղճորեն կատարելու համար վարչության մի խումբ աշխատակիցների պարգևատրելով պատվոգրերով և շնորհակալագրերով:
Հավելենք, որ օրվա առթիվ Արմավիրի մարզային փրկարար վարչության աշխատակիցները խրախուսական պարգևներ են ստացել նաև համայնքապետերի կողմից: