Արմավիրի մարզպետի աշխատակազմ

Արազափ համայնքում ավարտվել են սուբվենցիոն ծրագրով նախատեսված երկու խորքային հորի վերականգնման աշխատանքները. միջնաժամկետ հատվածում լուծվել է 230 հա հողատարածքի ոռոգման խնդիր, վերացվել է կրկնակի աղակալման վտանգը:

Ծրագրի ընդհանուր բյուջեն կազմել է 28 մլն 067.23 հազ. դրամ, որից ՀՀ պետական բյուջեից տրամադրված սուբվենցիայի չափաբաժինը եղել է 70%` 19 մլն 647.06 հազ. դրամ, իսկ համայնքի մասնակցությունը` 30%` 8 մլն 420.17 հազ. դրամ:

Արազափի հիմնական ջրատարը կառուցվել է 1980-ական թվականներին և նախատեսված է եղել 400 հա հողատարածքի համար: Տարիներ անց կատարվել է աղակալված հողերի աղազերծում և մշակովի հողատարածքներն ավելացել են 500 հա-ով` դառնալով 900 հա: Ավելացված հողատարածքների ոռոգումն այդ ժամանակահատվածում ապահովվել է խորքային հորերի միջոցով, որոնք հետագայում դադարել են գործել:

Սուբվենցիոն ծրագրով նախատեսված աշխատանքների շրջանակում մաքրվել են հորերը, լվացվել են էլռիֆտ եղանակով, ինչպես նաև կահավորվել են, որն իրենից ներկայացնում է ջրհան խողովակների տեղադրում, խորքային հորի պոմպի առկայություն` իր սարքավորումներով և էլեկտրական մասերով, խորքային հորերի ցանկապատի կառուցում, սնուցման էլեկտրասնուցման օդային գծի վերականգնում և տրանսֆորմատորային ենթակայանի տեղադրում:

Հավելենք, որ 230 հա հողատարածքի մշակման համար անհրաժեշտ աշխատուժի թիվը հասնում է 750-ի, այդ թվում` 200-300 հավելյալ աշխատուժ: