Արմավիրի մարզպետի աշխատակազմ

ՀՀ Արմավիրի մարզպետ Համբարձում Մաթևոսյանն այսօր Գետաշեն համայնքում ներկա է գտնվել Արցախյան երկրորդ պատերազմում զոհված հայորդիների հիշատակին նվիրված «Հավերժ փառք» խորագիրը կրող հուշ-ցերեկույթին, որին իրենց գեղարվեստական մասնակցությունն են ունեցել Գետաշենի միջնակարգ դպրոցի աշակերտները, Արմավիրի արվեստի պետական քոլեջի և Մեծամորի երաժշտական դպրոցի սաները:

Ողջունելով ներկաներին՝ մարզպետն իր վշտակցությունն է հայտնել քաջաբար ընկած գետաշենցիների ծնողներին, կանանց և հարազատներին՝ նշելով, որ հերոսներն անմահ են, իսկ նրանց սխրանքները՝ անգին, որ ցավի մեծ զգացում ու ափսոսանք է ապրում՝ խոնարհվելով նրանց հիշատակի առջև: Մարզպետն իր խոսքում որդիական սիրով դիմել է հերոս տղաների ծնողներին՝ շնորհակալություն հայտնելով նման հայրենանվեր ու արիական դաստիարակության համար, որի կրողն ու շարունակողը, ըստ նրա, Գետաշենի ներկա ու գալիք սերունդներն են:

ԶՈւ Արմավիրի տարածքային ստորաբաժանման ներկայացուցիչ, փոխգնդապետ Ռուդիկ Սարգսյանը Հայաստանի Հանրապետության և Արցախի Հանրապետության նախագահների կողմից հայրենիքի սահմանները պաշտպանելիս ցուցաբերած խիզախության և անմնացորդ նվիրումի համար կրտսեր սերժանտ Կարապետ Հարությունյանին և շարքային Թաթուլ Հովհաննիսյանին հետմահու հանձնել է «Մարտական ծառայություն» մեդալներ: Առաջիկայում հետմահու կպարգևատրվեն նաև պատերազմում հերոսաբար ընկած գետաշենցի Գագիկ Դավթյանը, Շիրազ Սանասարյանը և Արմենակ Գասպարյանը:

Հիշատակի միջոցառումն ամփոփվել է Արմավիրի թեմի հոգևորական տեր Ահարոն քահանա Գրիգորյանի ցավակցության և օրհնության խոսքով, որից հետո թեմի կողմից պատերազմում զոհված հայորդիների ծնողներին և կանանաց Աստվածաշունչ է հանձնվել: