Տեղեկատվական կենտրոն
Նորություններ
Տեղի է ունեցել կորոնավիրուսի դեմ պատվաստման վերաբերյալ խորհրդակցություն
02.06.2021
ՀՀ Արմավիրի մարզպետարանի նիստերի դահլիճում մարզային բուժկենտրոնների ղեկավարների մասնակցությամբ այսօր տեղի է ունեցել խորհրդակցություն, որը վարել են Առողջապահության փոխնախարար Լենա Նանուշյանը և մարզպետ Համբարձում Մաթևոսյանը:
Փոխնախարարը ներկայացրել է պատվաստումների դերը կորոնավիրուսային համաճարակը հաղթահարելու գործընթացում, ինչպես նաև ՀՀ կառավարության սահմանած առաջնահերթությունները, պատվաստանյութերի կիրառման կարգը, պայմանները՝ հավաստիացնելով, որ պետությունն ամեն ինչ անում է քաղաքացիների համար պատվաստումային գործընթացն ավելի հեշտացնելու, հասանելի դարձնելու համար:
Քննարկվել են մարզի բուժհաստատություններում կորոնավիրուսային հիվանդության դեմ իրականացվող պատվաստումների ընթացքին և ոլորտին վերաբերող մի շարք հարցեր:
Մարզպետ Համբարձում Մաթևոսյանը շնորհակալություն է հայտնել ներկաներին՝ նախորդ ծանր տարին պատվով անցկացնելու և «առաջնագծում» լինելու համար: Նա իր խոսքում շեշտել է պասվաստումը, որպես վարակի տարածումը կանխարգելող նշանակալի գործոն՝ հավելելով, որ ինքն անձամբ պատվաստվել է համավարակի դեմ: Նրա խոսքով՝ քաղաքացիների չպատվաստվելու միակ պատճառը վատ տեղեկացված լինելն է, որի համար ամենօրյա աշխատանքներ պետք է տարվեն, և բոլորի բարձր գիտակցության ու պատասխանատվության արդյունքում կյանքը կվերադառնա բնականոն հունին:
Հանդիպման ավարտին փոխմարզպետ Արգիշտի Մեխակյանի ուղեկցությամբ Առողջապահության նախարարի առաջին տեղակալ Լենա Նանուշյանն այցելել է Արմավիրի և Մեծամորի բժշկական կենտրոններ: