Արմավիրի մարզպետի աշխատակազմ

Դալարիկում համայնքների տնտեսական և սոցիալական ենթակառուցվածքների զարգացմանն ուղղված պետություն-համայնք համաֆինանսավորման #սուբվենցիոն ծրագրի շրջանակում կիրականացվի առաջնային կարևորություն ունեցող 5 ծրագիր.

• Կվերակառուցվեն 9 և 11 բազմաբնակարան շենքերի տանիքները,
• Օրջոնիկիձեի, Երիտասարդական, Գորկու և Շահումյան փողոցներում ոռոգման ներտնտեսային բաց և փակ ցանց կկառուցվի
• Կասֆալտապատվեն Կոմիտաս և Երիտասարդական փողոցները
• Կհիմնանորոգվի հանդիսությունների սրահը
• Կհիմնանորոգվի մարզասրահը

Դալարիկ համայնքում 2012 թվականի համար հաստատված սուբվենցիոն ծրագրի 1-ին բաղադրիչով կվերակառուցվի 9 և 11 շենքերի՝ ընդհանուր 922 քմ մակերեսով տանիքը: Նշված շենքերում բնակարանների թիվը 48-ն է, ընհանուր շահառուներինը՝ 192: Ծրագրի արդյունքում բնակիչների բնակարանների վերանորոգման ծախսերը կկրճատվեն 30 %-ով:

Օրջոնիկիձեի, Երիտասարդական, Գորկու և Շահումյան փողոցներում էլ ծրագրի շրջանակում կանցկացվի 1069 գծմ երկարությամբ ներտնտեսային բաց և փակ ցանց: Ծրագրով նախատեսված աշխատանքների արդյունքում 56 տնտեսություն կապահովվի կայուն ոռոգման ջրով, որն էլ իր հերթին կնպաստի բնակիչների շրջանում բանջարաբոստանային կուլտուրաների մշակմանը և պտղատու ծառերի աճեցմանը:

1976 թվականին ասֆալտապատված Կոմիտաս և Երիտասարդական փողոցների հիմնանորոգման ծրագրով կիրականացվի շուրջ 3300 քմ երթևեկելի մասի ասֆալտբետոնե ծածկի կապիտալ վերանորոգում: Հիշեցնենք, որ 1,5 կմ երկարությամբ Կոմիտասի փողոցի 7415.6 քմ հատվածը նույն ծրագրի շրջանակում հիմնանորոգվել է 2019-2020 թվականներին:

Սեփականության իրավունքով Դալարիկ համայնքին պատկանող հանդիսությունների սրահի տանիքը վերանորոգվել է 2020 թվականի սուբվենցիոն ծրագրով, իսկ 2021-ին հաստատված ծրագրային հայտով նախատեսվում է նոր մետաղապլաստե դռների և պատուհանների տեղադրում, ներքին լուսավորության ցանցի, ջեռուցման համակարգի, ջրագծերի և կոյուղագծերի անցկացում և ներքին հարդարում:

Համայնքի մարզասրահի հիմնանորոգումը կարևոր նշանակություն կունենա Դալարիկում և մոտակա համայնքներում ֆիզիկական կուլտուրայի զարգացման և առողջ կենսակերպ վարելու գործում: Ծրագրով նախատեսված աշխատանքների ավարտից հետո նախատեսվում է նաև բակային հատվածի բարեկարգում:

Դալարիկ համայնքում վերոնշյալ ծրագրերի շրջանակում նախատեսվող աշխատանքների ընթացքում կստեղծվի ավելի քան 50 ժամանակավոր աշխատատեղ