Արմավիրի մարզպետի աշխատակազմ

ՀՀ Արմավիրի մարզպետ Համբարձում Մաթևոսյանն այսօր մասնակցել է ՀՀ կառավարության հերթական նիստին, որը վարել է ՀՀ վարչապետ Նիկոլ Փաշինյանը: Օրակարգային հարցերի շրջանակում կառավարությունը հավանության է արժանացրել Արմավիրի մարզի Արևիկ և Արազափ համայնքներին ՀՀ պետական բյուջեով արդեն իսկ նախատեսված սուբվենցիաներից բացի այլ սուբվենցիաներ տրամադրելու նպատակով Արմավիրի մարզպետարանին 25 մլն 479.9 հազար դրամ հատկացնելու վերաբերյալ որոշման նախագիծը:

Ըստ որոշման նախագծի՝ նշված գումարը համապատասխան համայնքներին հատկացվում է մարզպետարանի և համայնքի միջև կնքված սուբվենցիայի տրամադրման մասին պայմանագրի հիման վրա։

Օրակարգային հարցի շրջանակում վարչապետ Նիկոլ Փաշինյանն ըստ մարզերի ներկայացրել է սուբվենցիոն ծրագրերի՝ 2018-20, ապա 2021 թվականների վիճակագրությունը, համաձայն որի՝ միայն Արմավիրի մարզում 2018-2020 թվականներին իրականացվել է 102 ծրագիր՝ 2 մլրդ 883 մլն 550 հազար դրամ ընդհանուր արժեքով, իսկ հաշվետու տարում հաստատվել է 60 ծրագիր՝ 2 մլրդ 861 մլն դրամի շրջանակում: