Տեղեկատվական կենտրոն
Նորություններ
ՀՀ Արմավիրի մարզպետ Էդվարդ Հովհաննիսյանի շնորհավորանքի խոսքը Ամանորի և Սուրբ Ծննդյան տոների առթիվ
30.12.2021
![](http://armavir.mtad.am/files/n_pics/30659_s.jpg)
Իմ հայրենի մարզի սիրելի բնակիչներ, հարգելի հայրենակիցներ,
Ի սրտե շնորհավորում եմ բոլորիդ Ամանորի և Սուրբ Ծննդյան տոների առթիվ:
Այս օրերին մեզանից շատերը մտովի կամ առարկայորեն ամփոփել են անցնող տարին, առանձնացրել ձեռքբերումներն ու կորուստները, իրականացված ու անկատար մնացած ծրագրերը և նախանշել գալիք տարվա առաջնահերթությունները:
Որպես Արմավիրի մարզպետ՝ շատ հակիրճ կձևակերպեմ 2022 թվականին մարզային իշխանության որդեգրած քաղաքականությունը, այն է՝ համառ և նպատակային աշխատանքով տարբեր ոլորտներում ապահովել արդյունքային կարևոր ցուցանիշներ:
Արմավիրի մարզի սիրելի բնակիչներ, հարգելի գործընկերներ,
Մարզային բազմաոլորտ տնտեսության զարգացման տեսլականը կյանքի ենք կոչելու միահամուռ ուժերով, յուրաքանչյուրս մեր գործառույթների և հնարավորությունների շրջանակում՝ առանց ջանք ու եռանդ խնայելու: Եվ սա է դառնալու հաջողության հասնելու մեր գրավականը, մեր հայրենի մարզը շենացնելու միակ ճանապարհը, որով ուղղորդվելու ենք 2022 թվականի ընթացքում:
Իսկ այսօր եկեք նախ մեր խոնարհումը հայտնենք հանուն հայրենիքի նահատակված մեր բոլոր հերոսների հիշատակին, մեր զորակցությունը՝ նրանց ընտանիքներին և մեր համախմբվածությունը՝ ավելի լավ Հայաստան, մարզ ու համայնք ունենալու գաղափարի շուրջ:
Կրկին շնորհավորելով բոլորիդ հույս, հավատ ու սեր ներշնչող ամանորյա տոների առթիվ՝ ցանկանում եմ, որ խաղաղ երկնքի ներքո յուրաքանչյուրս իրականություն դարձնենք մեր մեծ ու փոքր նպատակները, լինենք համերաշխ ու միասնական: Թող առողջությունը, սերն ու հաջողությունը գերիշխի բոլոր ընտանիքներում:
Շնորհավոր Ամանոր և Սուրբ ծնունդ: