Տեղեկատվական կենտրոն
Նորություններ
Կառավարությունը կսուբսիդավորի պարարտանյութերի ձեռքբերումը. Հաստատվել է մատչելի գներով պարարտանյութերի ձեռքբերման աջակցության ծրագիրը
09.03.2022
Արմավիրի մարզի հարգելի բնակիչներ,
Կառավարության կողմից օրերս ընդունված որոշմամբ հաստատվել է Հայաստանի Հանրապետության հողօգտագործողներին մատչելի գներով ազոտական, ֆոսֆորական և կալիումական պարարտանյութերի ձեռքբերման աջակցության ծրագիրը, որի մասնակիցներն են Էկոնոմիկայի նախարարությունը, մարզպետարանները, համայնքները և պարարտանյութերի վաճառք իրականացնող իրավաբանական անձինք և գյուղատնտեսությունում տնտեսավարողները:
Ծրագրով նախատեսված է՝
Մեկ շահառուի հաշվով պարարտանյութ տրամադրել առավելագույնը 3 հեկտար հողատարածքում մշակություն իրականացնելու համար, իսկ հողամասի նկատմամբ համասեփականատերերի առկայության դեպքում ծրագրից կարող է օգտվել համասեփականատերերից միայն մեկը։
Ծրագիրն իրականացվելու է մատակարարների կողմից շահառուներին վաճառվող պարարտանյութի վաճառքի գնի 50 տոկոսի չափով սուբսիդավորմամբ կամ փոխհատուցմամբ, բայց ոչ ավելի, քան 50 կգ քաշով 1 պարկ պարարտանյութի հաշվով՝ 9000 դրամը։
Ելնելով շահառուի կողմից մշակվող հողատարածքի չափից՝ պարարտանյութերի վաճառքն իրականացվելու է հետևյալ չափաքանակներով՝
• ազոտական պարարտանյութ` 1 հեկտարի համար մինչև 500 կգ.
• ֆոսֆորական պարարտանյութ` 1 հեկտարի համար մինչև 400 կգ.
• կալիումական պարարտանյութ` 1 հեկտարի համար մինչև 300 կգ։
Մատակարարների կողմից պարարտանյութերի վաճառքն իրականացվում է մարտի 17-ից մինչև հունիսի 15-ը ներառյալ ընկած ժամանակահատվածում։
Շահառուները ծրագրին մասնակցելու համար մինչև մարտի 21-ը ներառյալ պետք է դիմեն համայնքի կամ բնակավայրի վարչական ղեկավարին` նշելով նախընտրելի մատակարարին և պահանջվող պարարտանյութերի քանակները՝ ըստ տեսակների։