Տեղեկատվական կենտրոն
Նորություններ
Խորհրդակցություն՝ մարզի առողջապահության ոլորտի ներկայացուցիչների մասնակցությամբ
13.04.2022
ՀՀ Արմավիրի մարզպետ Էդվարդ Հովհաննիսյանն այսօր խորհրդակցություն է անցկացրել մարզի առողջապահական հաստատությունների, բուժամբուլատորիաների ղեկավարների և մարզպետարանի ոլորտային պատասխանատուների մասնակցությամբ:
Նշելով, որ առողջապահական համակարգը մի շղթա է, որի գործունեության արդյունավետությունը պայմանավորված է յուրաքանչյուրի աշխատանքով, մարզպետը խոսել է առողջապահության ոլորտում առկա խնդիրների ու անելիքների մասին: Հատկապես մտահոգիչ համարելով բնակիչների կողմից ստացվող բողոքները, միաժամանակ բուժհաստատությունների աշխատակիցների սահմանափակ միջոցները՝ մարզպետ Էդվարդ Հովհաննիսյանն անհրաժեշտ է համարել կազմակերպված և հոգատար վերաբերմունքը աշխատանքի ու բնակիչների նկատմամբ՝ շեշտելով. «Աշխատանքը ծառայություն է, որը յուրաքանչյուր ոք պարտավոր է կատարել պատվով: Առողջապահական հաստատությունները շատ կարևոր են հատկապես հիվանդությունների առաջնային կանխարգելման, պատվաստումների աշխարհագրությունն ապահովելու գործում, և խնդրանքս է՝ նվիրումով և բարեխղճորեն մոտենալ աշխատանքին»:
Հանդիպումը շարունակվել է մարզպետի խորհրդական Սաթենիկ Թովմասյանի կողմից առողջապահական ոլորտին վերաբերող որոշ հարցերի ներկայացմամբ, որն ամփոփվել է ներկաների հետ քննարկմամբ ու փոխադարձ պայմանավորվածություններով: