Տեղեկատվական կենտրոն
Նորություններ
Հիշատակն արդարների թող միշտ օրհնությամբ հիշվի. մարզպետն Արմավիր և Էջմիածին համայնքներում հարգանքի տուրք է մատուցել Հայոց մեծ եղեռնի զոհերի հիշատակին
24.04.2022
Մարզպետ Էդվարդ Հովհաննիսյանը մարզի միավորված համայնքների ղեկավարների, ՏԻՄ ներկայացուցիչների ու մարզպետարանի պաշտոնատար անձանց հետ Արմավիրի Սուրբ Գրիգոր Նարեկացի եկեղեցում այսօր մասնակցել է Հայոց Ցեղասպանության նահատակների հիշատակին մատուցված Սուրբ Պատարագին՝ հանդիսապետությամբ թեմակալ առաջնորդ Գերաշնորհ Տեր Սիոն արքեպիսկոպոս Ադամյանի:
Պատարագի ավարտին կատարվել է Հայոց ցեղասպանության սրբադասված նահատակների բարեխոսական կարգ՝ հայցելով Սուրբ նահատակների բարեխոսությունն առ Աստված՝ աշխարհասփյուռ հայ ժողովրդի անվտանգ կյանքի և հայրենիքի խաղաղության ու բարօրության համար:
Այնուհետև ներկաները քաղաքային զբոսայգում ծաղկեպասակներ են դրել և ծաղիկներ խոնարհել Եղեռնի անմեղ զոհերի հիշատակը հավերժացնող հուշակոթողին:
Մարզպետն այցելել է նաև Էջմիածին քաղաք, Հայոց հոգևոր կենտրոնում հարգանքի տուրք մատուցել՝ ծաղիկներ խոնարհելով 1915 թվականի չարագործությանը զոհ դարձած հայերի անմար հիշատակին նվիրված Աղոթքի և ուխտի խաչքարին:
Հավելենք, որ մարզի այլ համայնքներում ևս տեղի են ունեցել ոգեկոչման ու հիշատակի միջոցառումներ: