Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մարզպետն այցելել է Բաղրամյան համայնքի Վանանդ բնակավայր
08.06.2022
ՀՀ Արմավիրի մարզպետ Էդվարդ Հովհաննիսյանն այսօր այցելել է Բաղրամյան համայնքի Վանանդ բնակավայր:
Այցի շրջանակում մարզպետը նախ հանդիպում է ունեցել համայնքային իշխանության ներկայացուցիչների և բնակչության հետ, քննարկել գյուղատնտեության ապահովագրությանը, բնակավայրում նախատեսվող ասֆալտապատման ծրագրին և դպրոցին կից մանկապարտեզի վերաբացմանը վերաբերող հարցեր: Անդրադարձ է եղել նաև հակակարկտային կայանների արդյունավետ գործարկմանը: Նշվել է, որ բնակավայրում 17 կայան է տեղակայված, որոնց լիարժեք տեխնիկական սպասարկումն ապահովելու դեպքում գյուղացիական տնտեսություններն ամբողջությամբ կպաշտպանվեն կարկտից: Պայմանավորվածություն է ձեռք բերվել լիազոր մարմնի միջնորդությամբ խնդրին հնարավոր լուծում տալ:
Այնուհետև Էդվարդ Հովհաննիսյանն այցելել է Վանանդի միջնակարգ դպրոց, շրջել կրթօջախում, ծանոթացել շենքային պայմաններին, ապա մասնակցել «Ազգայինն է պահպանում հայրենիքը» խորագիրը կրող հայ ազգագրական երգ ու պարի փառատոնին:
Ողջունելով միջոցառման մասնակիցներին՝ մարզպետը նշել է, որ փառատոնի խորագիրը վերահաստատում է ազգային արժեքներով առաջնորդվելու և մեր ինքնությանը հավատարիմ մնալու կարևորությունը: Իսկ ազգային երգն ու պարը, ըստ նրա, տարիներ շարունակ համախմբել են հայ ժողովրդին և յուրօրինակ այցեքարտ դարձել հայության համար:
Էդվարդ Հովհաննիսյանն իր խոսքում ընդգծել է. «Նմանատիպ փառատոնների միջոցով պետք է մեր առջև նպատակ դնենք պահպանելու ու տարածելու ազգային, ավանդական երգն ու պարը, ինչպես նաև երիտասարդ սերնդի համար մեր մշակութային ժառանգությունը դարձնենք առավել ճանաչելի: Կարծում եմ, որ մեր մարզի կտրվածքով մշակութային այս կարևոր և ինքնատիպ իրադարձությունը շարունակություն կունենա, կընդլայնի մասնակիցների շրջանակը և ազգային երգն ու պարը կենցաղ կվերադարձնի»:
Կարևորելով փառատոնի իրականացման գաղափարը՝ մարզպետը շնորհակալություն է հայտնել բոլոր կազմակերպիչներին՝ հուսալով, որ այն դրական ազդակներ կփոխանցի մասնակիցներին՝ արդարացնելով իր բուն նպատակը:
