Արմավիրի մարզպետի աշխատակազմ

ՀՀ Արմավիրի մարզպետ Էդվարդ Հովհաննիսյանն այսօր հանդիպում է ունեցել մարզում համաֆինանսավորման սուբվենցիոն ծրագրերով շինաշխատանքներ իրականացնող կազմակերպությունների պատասխանատուների և համայնքային իշխանության ներկայացուցիչների հետ, քննարկել ծրագրերի ժամկետներին և հետագա աշխատանքների կազմակերպանը վերաբերող մանրամասներ:

Անընդունելի համարելով շինաշխատանքների կատարման դանդաղ ընթացքը և ավարտական փաստաթղթերի ոչ լիարժեք ապահովման գործընթացը՝ մարզպետն առաջարկել է վերանայել ընհանուր գործելաոճը, իսկ նախորդ երեք տարիներին մեկնարկած և ընթացքի մեջ գտնվող ծրագրերը հնարավորինս սեղմ ժամկետում ավարտին հասցնել: 

Նա նաև անդրադարձել է տեխնիկական հսկողություն իրականացնող կազմակերպությունների կողմից մատուցվող ոչ պատշաճ ծառայություններին, որի արդյունքում կատարված աշխատանքները վերանայելու և հավելյալ միջոցներ ներդնելու անհրաժեշտություն է առաջանում:

Կարևորելով շինաշխատանքների պատշաճ կազմակերպումը՝ Էդվարդ Հովհաննիսյանը ոլորտի գործընկերներին առաջարկել է մրցութային գործընթացներին մասնակցել ամենայն պատասխանատվությամբ և կատարողական բարձր ցուցանիշ ապահովելու գիտակցումով: Նա միաժամանակ ընդգծել է, որ օբյեկտիվ և սուբյեկտիվ պատճառներով բաց թողնված պայմանագրային ժամկետները չպետք է անդրադառնան իրականացվող աշխատանքների որակի վրա: