Արմավիրի մարզպետի աշխատակազմ

Նոր ուսումնական տարվա մեկնարկի կապակցությամբ մարզպետ Էդվարդ Հովհաննիսյանն այսօր այցելել է Մերձավանի միջնակարգ դպրոց, ներկա գտնվել սեպտեմբերմեկյան միջոցառմանը:

Շնորհավորելով աշակերտներին և ուսուցիչներին տոնական օրվա առթիվ՝ մարզպետը մաղթել է նրանց հաջողություններով և նորանոր ձեռքբերումներով լի ուսումնական տարի: Ընդգծելով արդի աշխարհում բազմակողմանի զարգացած, պատշաճ կրթություն ստացած, ազգային արժեքներ կրող և պետականության զգացումով քաղաքացիներ կրթելու և դաստիարակելու կարևորությունը՝ Էդվարդ Հովհաննիսյանն ուսուցիչներից ակնկալել է անվերապահ նվիրում ուսումնադաստիարակչական բարդ գործընթացում:

Նա իր խոսքում նշել է, որ միայն փոխհամագործակցված սրտացավ աշխատանքի, ոլորտում յուրաքանչյուրի անելիքների հստակ գիտակցման և գիտելիքի ուժով մեր երկիրը շենացնելու մեծ պատասխանատվության արդյունքում կարող ենք ունենալ գիտելիքահեն հասարակություն և զարգացող պետություն:

«Սիրելի ուսուցիչներ, նկատելով աշակերտների շրջանում ուսման նկատմամբ հետաքրքրության նվազումը, դուք չպետք է վհատվեք, այլ նոր մոտեցումներ որդեգրեք և ավելի հետևողական լինեք իրավիճակը շտկելու և ձեր առջև դրված խնդիրները լուծելու համար: Ես վստահ եմ, որ ապագա սերնդին այսօր փոխանցվող գիտելիքը ծառայելու է մեր հայրենիքի հզորացմանն ու շենացմանը»,- ամփոփելով իր խոսքը՝ նշել է Էդվարդ Հովհաննիսյանը՝ ցանկանալով, որ նոր ուսումնական տարին մեծ ուժ ու եռանդ հաղորդի ոլորտի նվիրյալներին, ուսումնառության նկատմամբ մեծ ձգտում և գիտելիքների հարստացմանն ուղղված անսպառ ջանքեր՝ դպրոցականներին և ուսանողներին: