Արմավիրի մարզպետի աշխատակազմ

Արմավիրի մարզպետ Էդվարդ Հովհաննիսյանը ՀՀ առողջապահության նախարարի տեղակալ Արմեն Նազարյանի հետ Մյասնիկյան բնակավայրում մասնակցել է «Ֆիզիկական ակտիվության խրախուսման միջսերնդային միջոցառում» երկօրյա արշավին, որի նպատակն է իրազեկել բնակչությանը առողջ ապրելակերպի մասին, խրախուսել առողջ սննդի պատրաստումը, ֆիզիկական ակտիվությունը, ամրապնդել միջսերնդային կապը:

Հանրային առողջության, առողջ ապրելակերպին վերաբերող իրազեկման արշավին, որը մեկնարկել է նախորդ օրը Գետաշեն բնակավայրում և շարունակվել այսօր Մյասնիկյանում, դպրոցականներից, մանկավարժներից, առողջապահական համակարգի աշխատակիցներից, մարզպետարանի ոլորտային պատասխանատուներից բացի ներգրավվել են նաև տարեցներն ու երեխաները:

Միջոցառումը սկսվել է քայլերթով և ավարտվել տվյալ բնակավայրի դպրոցում, որտեղ կազմակերպվել են սպորտլանդիաներ, առողջ օրակարգի ձևավորման վերաբերյալ խմբային քննարկումներ, տաղավարներում առողջ սննդի պատրաստման վարպետաց դասեր, մի շարք միջոցառումներ՝ բոլորն էլ միտված առողջ ապրելակերպին: