Արմավիրի մարզպետի աշխատակազմ

Մարզպետ Էդվարդ Հովհաննիսյանը Մեծամոր միավորված համայնքի Ալաշկերտ բնակավայրում այսօր ներկա է գտնվել «Ոսկե աշուն» խորագիրը կրող համայնքային միջոցառմանը, որին համայնքի դպրոցի և նախակրթարանի սաները հանդես են եկել երգ ու պարով, գեղարվեստական տարբեր կատարումներով:

Ողջունելով ներկաներին և խոսելով մանկության հաճելի հիշողությունների մասին՝ մարզպետը նշել է, որ հպարտություն է ապրում՝ գտնվել հայրենի կրթօջախում կազմակերպված նման միջոցառմանը: էդվարդ Հովհաննիսյանը կարևորել է մշակութային միջոցառումները, որոնք հնարավորություն են տալիս ազգային արժեքներով կրթել ու դաստիարակել աշակերտներին և այդ ամենը փոխանցել սերնդեսերունդ:

Ցերեկույթի գեղարվեստական մասի ավարտին մարզպետը շրջել է բերք ու բարիքով, ազգային խոհանոցի ուտեստներով լի սեղաններ ներկայացնող տաղավարներում:

Մրցանակային տեղեր զբաղեցնելու համար տաղավարները միմյանց հետ մրցել են «Երիտասարդ ձեռներեցներ», «Լավագույն մտահղացում», «Հեքիաթային տաղավար» ու մի շարք այլ անվանակարգերում։ Լավագույնները մարզպետի կողմից արժանացել են պատվոգրերի: