Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
ՀՀ Արմավիրի մարզպետ Էդվարդ Հովհաննիսյանի շնորհավորանքի խոսքը Տեղական ինքնակառավարման մարմինների օրվա առթիվ
09.11.2022
Տեղական ինքնակառավարման մարմինների հարգելի գործընկերներ,
Շնորհավորում եմ բոլորիդ տեղական ինքնակառավարման համակարգի կազմավորման 26-ամյակի կապակցությամբ:
Հայաստանի անկախ հանրապետության կառավարման ինստիտուտի զարգացման համար կարևորագույն ձեռքբերումներից է տեղական ինքնակառավարման համակարգի ներդրումը, որն իր գոյության ողջ ընթացքում կայացման դժվարին ուղի է անցել:
Նախորդ տարի Արմավիրի մարզում տեղի ունեցած համայնքների խոշորացումով մարզի ՏԻՄ պատմության մեջ սկսվեց մի նոր փուլ՝ լի բազմաթիվ խնդիրներով ու բարդություններով: Այդուհանդերձ, նորաստեղծ ՏԻՄ-ը հաղթահարում է իր առջև ծառացած ցանկացած խոչընդոտ՝ բոլորիս համախմբված ու նպատակաուղղված աշխատանքի շնորհիվ: Արվում է հնարավորն ու անհնարինը՝ ստեղծելու մի ամրակուռ շղթա, որի օղակները, մեկը մյուսին լրացնելով, նպաստում են մարզի զարգացմանն ու առաջընթացին:
Կարևոր եմ համարում նշել, որ տարածքային մարմինների համաչափ և կայուն զարգացումը կառավարության առաջնահերթություններից է, որոնց միտված բարեփոխումները սուբվենցիոն և այլ ծրագրերի տեսքով նպաստում են համայնքային ենթակառուցվածքների, բնակչության կենսամակարդակի բարելավմանը:
Հարգելի ավագանիներ, համայնքային ծառայողներ, ՏԻՄ ներկայացուցիչներ, համոզված եմ, որ մեր պատասխանատու աշխատանքի շնորհիվ օրըստօրե մեծանալու է քաղաքացիների հավատը տեղական ինքնակառավարման մարմինների հանդեպ: Կոչ եմ անում մեծագույն համբերատարությամբ մշտապես լինել բնակչի կողքին, ականջալուր լինել նրա խնդրին՝ այդ կերպ ամրապնդելով առկա ձեռբերումներն ու էլ ավելի զարգացնելով ՏԻՄ համակարգը, քանի որ հանրության խնդիրների լուծումը և համայնքային իշխանության գործունեության արդյունավետությունը պետության առաջընթացի գրավականն են:
Մեկ անգամ ևս շնորհավորում եմ բոլորիդ՝ մաղթելով արժանապատվորեն կրել համայնքային ծառայողի կոչումը:
