Արմավիրի մարզպետի աշխատակազմ

ՀՀ Արմավիրի մարզպետի խորհրդական Սաթենիկ Թովմասյանն ու մարզպետարանի մի շարք աշխատակիցներ այսօր պատվաստվեցին պապիլոմա վիրուսի դեմ:

Սաթենիկ Թովմասյանը նշեց, որ այս քայլով իրենք ցանկանում են ցույց տալ, որ պատվաստումն անվտանգ է և միտված է պաշտպանելու հիվանդությունից:

Պատվաստումը պապիլոմավիրուսային վարակի դեմ պայքարի միջոցառումներից մեկն է՝ ի լրումն սքրինինգային հետազոտությունների. այն հնարավորություն կտա էականորեն նվազեցնել հիվանդացության և մահացության դեպքերը:

Հայաստանում կանանց քաղցկեղային հիվանդությունների կառուցվածքում արգանդի պարանոցի քաղցկեղը երկրորդ տեղում է՝ կրծքագեղձի քաղցկեղից հետո, և այս վիրուսով Հայաստանը դասվում է բարձր հիվանդացություն ունեցող երկրների շարքում:

Մարդու պապիլոմա վիրուսների դեմ պատվաստումներն ունեն բարձր արդյունավետություն, նույնիսկ մեկ դեղաչափ պատվաստումը 80-85% դեպքերում առաջացնում է հակամարմինների պաշտպանիչ մակարդակ, ինչը համարվում է բարձր արդյունավետության ցուցանիշ:

Նշենք, որ մեր երկրում պատվաստանյութերը հասանելի են:

2017-ից մինչև օրս Հայաստանում պապիլոմա վիրուսի դեմ պատվաստման 100 հազարից ավելի դեղաչափ է կիրառվել: