Արմավիրի մարզպետի աշխատակազմ

ՀՀ Արմավիրի մարզպետարանի ՏԻՄ վարչության պետ Գոռ Հովհաննիսյանի գլխավորությամբ 2023 թվականի մարտի 2-ին անցկացվեց աշխատանքային խորհրդակցություն Արմավիր, Էջմիածին, Փարաքար, Խոյ, Արաքս, Բաղրամյան, Մեծամոր խոշորացված համայնքների համայնքապետարանների աշխատակազմի քարտուղարների և Ֆերիկ եզդիական համայնքի ղեկավարի տեղակալի մասնակցությամբ:

Աշխատանքային քննարկմանը մասնկնացում էին մարզպետարանի իրավաբանական բաժնի պետ, գլխավոր իրավաբան Լիաննա Հարությունյանը, ՏԻՄ վարչության աշխատակիցները, մարզային այլ պատասխանատուներ:

Գոռ Հովհաննիսյանը ողջունելով ներկաներին՝ ասաց, որ 2022 թվականը, համայնքների խոշորացման հետ կապված, բուռն աշխատանքային տարի էր. նոր ստեղծվող համայնքապետարանների աշխատակազմեր, բյուջեների հաստատում, հաստիքացուցակների և կառուցվածքների հաստատում, համայնքային ծառայության պաշտոնների անվանացանկերի կազմում և ներկայացում ՀՀ Արմավիրի մարզպետարան և ՀՀ տարածքային կառավարման և ենթակառուցվածքների նախարարություն: Այս ամենը պահանջում էր լուրջ կազմակերպչական աշխատանք, որն իրականացվեց մարզպետարան-համայնք կայուն և արդյունավետ համագործակցության շնորհիվ:

Կարճ ժամանակահատվածում ստեղծվեցին աշխատակազմեր՝ պայմանագրային համայնքային ծառայողներով, ովքեր համայնքային տարաբնույթ խնդիրները սկսեցինք գույքագրել և ներկայացնել ըստ առաջնահերթության։

2022 թվականի ընթացքում Արմավիրի մարզում անցկացվել է ավելի քան 500 համայնքային ծառայողների թափուր պաշտոնների մրցույթ, որոնք սահմանված կարգով համալրվել են համապատասխան մասնագետներով:

Մարզպետարան–համայնքապետարաններ համատեղ աշխատանքների արդյունքում 2022 թվականի ավարտին արձանագրել ենք բարձր ցուցանիշ թե՛ սեփական եկամուտների հավաքագրման, թե՛ սուբվենցիոն ծրագրերի իրականացման, թե՛ համայնքի ղեկավարների լիազորությունների իրականացման ուղղությամբ:

Գոռ Հովհաննիսյանը ներկայացրեց 2023 թվականի ծրագրերը և մարզպետարան-համայնքապետարան հետագա համագործակցության ուղիները, վեր հանվեցին առկա խնդիրները, քննարկվեցին դրանց լուծման և վերացման քայլերը:

Վարչության պետը նշեց, որ բոլոր համայնքապետարանները պետք է առաջնային դարձնեն ավագանու նստաշրջանների ու նիստերի անցկացումը, գործընթացի նախապատրաստումը՝ օրենսդրության պահանջներին համապատասխան:

Մարզպետարանի իրավաբանական բաժնի պետ, գլխավոր իրավաբան Լիաննա Հարությունյանը հանդես եկավ խորհրդատվությամբ և մեթոդական օգնությամբ:
Լիաննա Հարությունյանը նշեց, որ հետևողական լինեն և ապահովեն համայնքի ղեկավարի, ավագանու որոշումների և այլ իրավական ակտերի բովանդակային և ՀՀ օրենսդրության համապատասխանությունը, ինչպես նաև համայնքի ղեկավարի և ավագանու որոշումները սահմանված ժամկետներում ներկայացնեն մարզպետարան, ապահովեն մարզպետարանի և համայնքապետարանի միջև օրենսդրությամբ սահմանված կարգով և ժամկետներում փաստաթղթաշրջանառությունը և հաշվետվությունների ներկայացումը:

Գոռ Հովհաննիսյանը ավելացրեց, որ անհրաժեշտ է առավել ակտիվացնել համայնքների համացանցային կայքերի վարումը, լինել հետևողական, ինչպես նաև իրականացնել ավագանու նիստերի առցանց հեռարձակումը՝ ապահովելով բնակչության իրազեկվածությունը:

Աշխատանքային խորհրդակցության վերջում վարչության պետը նշեց, որ կարևորում է համայնքապետարանների աշխատակազմի քարտուղարների գործառույթը և ակնկալում է նրանց ակտիվ մասնակցությունը համայնքային աշխատանքներին և համայնքներում իրականացվող բոլոր միջոցառումներին:

«Նմանատիպ հանդիպում-քննարկումները պարբերաբար կկազմակերպվեն թե՛ մարզպետարանում, թե՛ համայնքապետարաններում: Վստահ եմ, որ մեր համատեղ հետևողական աշխատանքն էլ ավելի արդյունավետ կդարձնի համայնք-մարզպետարան համագործակցությունը»,- խորհրդակցությունն ամփոփեց Գոռ Հովհաննիսյանը: