Արմավիրի մարզպետի աշխատակազմ

Հարգելի՛ հայրենակիցներ,

շնորհավորում եմ Հանրապետության տոնի առթիվ:

Մայիսի 28-ը հայ ժողովրդի պատմության մեջ աննախադեպ իրադարձություն է, որով հիմնադրվեց Առաջին Հանրապետությունը, և հայ ժողովուրդն իր իշխանությունը հաստատեց սեփական հայրենիքում։

Հայ ժողովրդի կողմից անկախ պետականությունը վերականգնելու դարավոր երազանքն իրականացավ մայիսի 28-ին՝ դառնալով հայոց պետականության վերածննդի խորհրդանիշը։

Թուրքական բանակի դեմ տարած մայիսյան հաղթանակները Սարդարապատում, Բաշ Ապարանում, Ղարաքիլիսայում փրկեցին Արևելյան Հայաստանի վերջին հողակտորները և հայությանը, և մեր ժողովուրդը ​ վերականգնեց Հայոց անկախ պետականությունը՝ հռչակելով Հայաստանի առաջին հանրապետության ծնունդը:

Սիրելի հայրենակիցներ, մաղթում եմ, որ մեր հաղթական ոգին ուղեկից լինի նոր սերունդներին արարելու, կրթության և գիտության, մշակույթի, սպորտի և տարբեր ոլորտներում նոր նվաճումների և հաղթանակների հասնելու, իր տունն ու հայրենիքը շենացնելու, զարգացնելու ճանապարհին։

Այսօր էլ հայ ժողովրդի առջև ծառացած դժվարին օրերին Մայիսի 28-ի խորհուրդով պետք է էլ ավելի մեծացնել հայրենիքի հանդեպ մեր սերն ու նվիրումը, ​ միմյանց նկատմամբ սիրով ու հոգատարությամբ հաղթահարենք բոլոր դժվարությունները՝ շենացնելով մեր անկախ Հանրապետությունը։