Արմավիրի մարզպետի աշխատակազմ

​ՀՀ կառավարության այսօրվա նիստում հավանության է արժանացել Լեռնային Ղարաբաղից բռնի տեղահանված անձանց ժամանակավոր պաշտպանության տակ վերցնելու վերաբերյալ նախագիծը, որով առաջարկվում է ժամանակավոր պաշտպանության տակ վերցնել`

1. Լեռնային Ղարաբաղի բնակչության ռեգիստրի հաշվառումներով անցնող անձանց,

2. Հայաստանի Հանրապետության տարածքում կամ Հայաստանի Հանրապետությունից դուրս գտնվող այն անձանց, որոնց վերջին հաշվառման հասցեն եղել է Լեռնային Ղարաբաղում,

3. այն անձանց, ովքեր չեն ունեցել հաշվառում Լեռնային Ղարաբաղի բնակչության ռեգիստրում, սակայն բնակվել են Լեռնային Ղարաբաղում և 2023 թվականի սեպտեմբերի 19-ից Ադրբեջանի կողմից Լեռնային Ղարաբաղի դեմ սանձազերծած ռազմական գործողությունների հետևանքով բռնի տեղահանվելուց հետո հաշվառվել են Հայաստանի Հանրապետության ներքին գործերի նախարարության միգրացիայի և քաղաքացիության ծառայության կողմից։

Նախագծի ընդունմամբ հստակեցվում է ԼՂ–ից բռնի տաղահանված անձանց իրավական կարգավիճակը, և դրանով նաև նրանց իրավունքների ու պարտականությունների շրջանակը։ ժամանակավոր պաշտպանության տակ վերցված անձինք օրենքի ուժով դառնում են փախստական և օգտվում են փախստականների համար օրենքով և միջազգային կոնվենցիաներով, այդ թվում՝ փախստականների կարգավիճակի մասին 1951 թվականի կոնվենցիայով նախատեսված իրավունքներից։ Որոշման ընդունումը հնարավորություն է տալիս ձեռնամուխ լինել նրանց իրավունքների և օրինական շահերի արդյունավետ պաշտպանությանը։