Արմավիրի մարզպետի աշխատակազմ

ՀՀ Արմավիրի մարզպետ Արգիշտի Մեխակյանն այսօր ներկա է գտնվել «Արմավիրի երիտասարդների տուն» բաց երիտասարդական կենտրոնի 2024 թվականի տարեկան հաշվետու միջոցառմանը։

Հաշվետվության լսմանը մասնակցել են Արմավիր համայնքի ղեկավար Վարշամ Սարգսյանը, «Երիտասարդական նախաձեռնությունների կենտրոն» ՀԿ-ի խորհրդի նախագահ Արթուր Նաջարյանը, Հայաստանում ՅՈՒՆԻՍԵՖ–ի ներկայացուցչի տեղակալ Սիլվիա Մեսթրոնին, գործընկեր դպրոցների տնօրեններ, հյուրեր:

Արգիշտի Մեխակյանը ողջունել է ներկաներին, ընդգծել «Երիտասարդական նախաձեռնությունների կենտրոն»–ի գործունեության կարևորությունը, ինչպես նաև երիտասարդների՝ քաղաքացիական ակտիվության բարձրացման ու համայնքային կյանքին ակտիվ ներգրավվածություն ունենալու առաքելությունը:

Միջոցառման ընթացքում կենտրոնի համակարգող Հռիփսիմե Հովհակյանը ներկայացրել է 2024 թվականի ընթացքում իրականացված աշխատանքները, ծրագրերում ընդգրկված երիտասարդների ձեռքբերումները, միջազգային համագործակցությունների շրջանակը և այլն:

Հավելենք, որ Արմավիրի երիտասարդների տունը բաց երիտասարդական աշխատանքի մեթոդաբանությամբ եւ սկզբունքներով աշխատող նմանատիպ 5 կենտրոններից մեկն է Հայաստանում, որը հիմնադրվել է 2022 թվականին՝ Արմավիրի համայնքապետարանի, ՄԱԿ-ի մանկական հիմնադրամի (ՅՈՒՆԻՍԵՖ) եւ Գյումրու «Երիտասարդական նախաձեռնությունների կենտրոն» ՀԿ-ի համագործակցությամբ:

Կենտրոնի գործունեությունը նպատակաուղղված է երիտասարդների կյանքի որակի բարելավմանն ու համայնքային կյանքին ներգրավվածություն ունենալուն: Կենտրոնի աշխատակիցների եւ սաների կողմից պարբերաբար իրակացվում են համայնքանպաստ բազմաոլորտ նախագծեր:

Կենտրոնի գործունեության հիմնական ուղղություններն են՝

• մասնագիտական կողմնորոշում
• քաղաքացիական կրթություն
• բովանդակալից ժամանց
• կյանքի հիմնարար հմտություններ
• առողջ ապրելակերպ
• առաջնորդություն և նախաձեռնողականություն։