Արմավիրի մարզպետի աշխատակազմ

Հերթական համայնքային այցի շրջանակում Արմավիրի մարզպետ Արգիշտի Մեխակյանն այցելել է Արմավիր համայնքի Նորավան և Լենուղի բնակավայրերում կառուցվող նորակառույց մանկապարտեզների շինհրապարակներ։
Այցի ընթացքում մարզպետը համայնքի ղեկավար Վարշամ Սարգսյանի, ինչպես նաև մարզպետի աշխատակազմի և համայնքապետարանի ոլորտային պատասխանատուների ուղեկցությամբ տեղում դիտարկել է Քաղաքաշինության կոմիտեի պատվերով և ՀՀ պետական բյուջեի միջոցներով կառուցվող «մոդուլային» տիպի, 144 երեխայի համար նախատեսված մսուր-մանկապարտեզների շինարարական աշխատանքների ընթացքը։
Նորավանի մանկապարտեզի կառուցման ընդհանուր արժեքը կազմում է 742.4 մլն ՀՀ դրամ, իսկ Լենուղիում՝ 855.7 մլն ՀՀ դրամ։ Ծրագրերի ավարտը նախատեսվում է 2025 թվականին։
Շինհրապարակներում Արգիշտի Մեխակյանը զրուցել է շինարարների հետ, քննարկել ընթացիկ աշխատանքային խնդիրները և նախագծային լուծումները՝ շեշտելով կատարվող աշխատանքների որակն ապահովելու և սահմանված ժամկետները պահպանելու անհրաժեշտությունը։