Արմավիրի մարզպետի աշխատակազմ

Համայնքների ղեկավարների ընդունելությունների շրջանակում մարզպետ Արգիշտի Մեխակյանի մոտ տեղի է ունեցել հերթական հանդիպումը։ Այսօր մարզպետն ընդունել է Վաղարշապատ համայնքի ղեկավարի պարտականությունները կատարող, համայնքի ղեկավարի առաջին տեղակալ Արսեն Պետրոսյանին և համայնքապետարանի աշխատակիցներին։
Մարզպետի աշխատակազմի ոլորտային պատասխանատուների մասնակցությամբ տեղի է ունեցել խորհրդակցություն, որտեղ ներկայացվել են Վաղարշապատում պետական բյուջեի միջոցներով և սուբվենցիոն ծրագրերով իրականացվող, ավարտական փուլում գտնվող, ինչպես նաև նախատեսվող աշխատանքները, քննարկվել են դրանց հետ կապված մի շարք հարցեր։
Արգիշտի Մեխակյանն իր խոսքում կարևորել է ներկայացված աշխատանքները և նշել, որ անհրաժեշտ է ուշադրության կենտրոնում պահել ժամկետների ու աշխատանքի որակի պահպանման վերահսկողությունը։