Արմավիրի մարզպետի աշխատակազմ

Մարզպետ Վահրամ Խաչատրյանը Արմավիր համայնքի ղեկավար Վարշամ Սարգսյանի, մարզպետի աշխատակազմի և համայնքապետարանի ոլորտային պատասխանատուների հետ այցելել է Խանջյան բնակավայր՝ հետևելու Արմեն Բենիամինի Հակոբյանի անվան միջնակարգ դպրոցի և մանկապարտեզի հիմնանորոգման աշխատանքների ընթացքին։

Խանջյանի վարչական ղեկավար Սահականուշ Արոյանի և դպրոցի տնօրեն Աննա Հովսեփյանի հետ պաշտոնյաները շրջել են կրթօջախում, ծանոթացել Հայաստանի տարածքային զարգացման հիմնադրամի ֆինանսավորմամբ իրականացվող աշխատանքներին։ Ծրագրի արժեքը 416 մլն ՀՀ դրամ է։

Շրջայց է կատարվել նաև գյուղի մանկապարտեզի շենքում, որի հիմնանորոգման սուբվենցիոն ծրագրի ընդհանուր արժեքը 387 մլն ՀՀ դրամ է՝ 70% կառավարության և 30% համայնքի համաֆինանսավորմամբ։ Հիմնանորոգվող մանկապարտեզը նախատեսված է 90 երեխայի համար։ Շինարարական աշխատանքները գտնվում են ավարտական փուլում։

Հետևելով իրականացվող աշխատանքներին, զրուցելով շինաշխատող պատասխանատուների հետ՝ Վահրամ Խաչատրյանը հանձնարարականներ է տվել և կարևորել պայմանագրային պարտավորությունների պատշաճ կատարումը։