Արմավիրի մարզպետի աշխատակազմ

Արմավիրի արվեստի պետական քոլեջում անցկացվել է «Բաց դռների օր» միջոցառումը, որի շրջանակում ձևավորվել է արդյունավետ հարթակ ուսանողների և ապագա դիմորդների միջև։

Քոլեջի բակում կազմակերպված տաղավարներում ուսանողները ներկայացրել էին քոլեջի մասնագիտական բաժինները, ձեռքբերումներն ու ուսումնական գործընթացի առանձնահատկությունները։ Նրանք հնարավորություն են ունեցել անմիջականորեն ներկայացնել իրենց մասնագիտությունները, կիսվել փորձով և պատասխանել հետաքրքրված այցելուների հարցերին։

Միջոցառումը ուղեկցվել է նաև գեղարվեստական հատվածով․ քոլեջի սաները հանդես են եկել երաժշտական կատարումներով՝ ներկայացնելով իրենց կատարողական հմտությունները և ստեղծագործական ներուժը։

Առանձին տաղավարներում ցուցադրվել են ուսանողների ձեռագործ և ստեղծագործական աշխատանքները՝ գեղանկարչություն, դեկորատիվ-կիրառական արվեստի նմուշներ, դիզայներական լուծումներ և այլ աշխատանքներ, որոնք արժանացել են այցելուների մեծ հետաքրքրությանը։

Միջոցառմանը ներկա էին Արմավիրի փոխմարզպետ Արամ Գրիգորյանը, քոլեջի տնօրեն Նունե Մուրադյանը, ՀՀ Արմավիրի մարզպետի աշխատակազմի կրթության, մշակույթի և սպորտի վարչության պետ Սոնյա Բուդաղյանը, մարզպետի աշխատակազմի ներկայացուցիչներ, հանրակրթական հաստատություններից աշակերտներ և մանկավարժներ, ինչպես նաև բազմաթիվ հյուրեր։