Արմավիրի մարզպետի աշխատակազմ

Սիրելի' արմավիրցի երիտասարդ,

Դիմում եմ եզակի թվով, որպեսզի հատուկ ընդգծեմ յուրաքանչուր երիտասարդ մարդու անհատականությունը ու կարևորությունը Հայաստանի Հանրապետության և հատկապես Արմավիրի մարզում ունեցած ավանդի համար։

Մարզում շուրջ 45, 000 քաղաքացի համարվում է երիտասարդ և նրանք իրենց ամենօրյա գործունեությամբ մասնագիտական գիտելիքների ներդրմամբ զարգացնում են մեր ծննդավայրը՝ Արմավիրը։

Երիտասարդության միջազգային օրը ևս մեկ հնարավորություն է ընդգծելու երիտասարդների կարևոր դերը աշխարհի զարգացման և կառուցման գործում, ինչպես նաև անդրադառնալու այն մարտահրավերներին ու խնդիրներին, որոնց նրանք առնչվում են առօրյա կյանքում։

Այս օրը կոչ է՝ լսելու երիտասարդների ձայնը, խրախուսելու նրանց մասնակցությունը հասարակական, տնտեսական և մշակութային գործընթացներին և ստեղծելու պայմաններ, որպեսզի յուրաքանչյուր երիտասարդ կարողանա լիարժեք իրացնել իր ներուժը։

Միաժամանակ Երիտասարդության միջազգային օրը հիշեցում է կառավարություններին, հասարակական կազմակերպություններին, մասնավոր հատվածին և բոլոր շահագրգիռ կողմերին, որ երիտասարդության խնդիրների լուծումը պահանջում է համատեղ ջանքեր, հետևողական քաղաքականություն և իրական գործողություններ։

ՄԱԿ-ի Գլխավոր ասամբլեան այս օրվա շրջանակում խրախուսում է բոլոր մակարդակներում տեղեկատվական և իրազեկման միջոցառումների իրականացումը՝ հատկապես երիտասարդների շրջանում, նպաստելով նրանց իրավունքների, հնարավորությունների և հասարակական գործընթացներում մասնակցության վերաբերյալ իրազեկվածության բարձրացմանը։

Երիտասարդության միջազգային օրը պետք է լինի ոչ միայն երիտասարդների մասին խոսելու, այլև նրանց լսելու, նրանց հետ երկխոսելու և նրանց գաղափարները իրականության վերածելու օր։

Երիտասարդների ներուժի լիարժեք օգտագործումը ներդրում է ոչ միայն նրանց ապագայի, այլև մեր հասարակությունների և ամբողջ աշխարհի կայուն զարգացման մեջ։

Շնորհավորելով հայաստանցի երիտասարդի օրը՝ մաղթում եմ, որ լինեք առողջ ու երջանիկ, ստեղծեք Հայաստանի հենասյունը համարվող ամուր ընտանիքներ ու արժանին մատուցեք Հայաստանի Հանրապետությանը՝ մեր բոլորի հայրենիքին։