Արմավիրի մարզպետի աշխատակազմ

ՀՀ Արմավիրի մարզպետ Գագիկ Միրիջանյանն Արմավիրի թեմի առաջնորդ Տեր Սիոն եպիսկոպոս Ադամյանի, Հայ Կրթական Հիմնարկության (ՀԿՀ) նախագահ Հերմինե Փախանյանի, Հայստանում դպրոցաշինության աշխատանքների պատասխանատու Նշան Փիրումյանի, պատվավոր հյուրերի և կրթության ոլորտի ներկայացուցիչների հետ այսօր ներկա է գտնվել Արևադաշտ համայնքի միջնակարգ դպրոցի բացման հանդիսավոր արարողությանը:

Արևադաշտի դպրոցը կառուցվել է Հայ Կրթական Հիմնարկության կողմից։ Հանրակրթական ուսումնական հաստատության հիմնարկեքի արարողությունը տեղի է ունեցել 2015 թվականի մարտ ամսին։ Այս ժամանակահատվածում ՀԿՀ-ի ֆինանսավորմամբ 70 աշակերտի համար կառուցվել է արդիական չափանիշներին համապատասխանող կրթօջախ, որն ամբողջությամբ կահավորվել է, համալրվել անհրաժեշտ գույքով, բարեկարգվել է բակը, կառուցվել են բասկետբոլի և վոլեյբոլի միջազգային չափանիշներին համապատասխանող մարզադաշտեր։

Կատարված ազգանվեր աշխատանքի համար շնորհակալություն հայտնելով ՀԿՀ-ի տնօրինությանը, բարերարներին և շնորհավորելով բոլորին դպրոցի բացման առթիվ՝ մարզպետ Գագիկ Միրիջանյանը նշել է. <<Մենք հայրենասեր, շինարար և կրթություն սիրող ժողովուրդ ենք: Ասվածիս ապացույցն այսօրվա միջոցառումն է, որը մեզ պարգևել են հայրենիքից դուրս ապրող, բայց հայրենիքի ապագայով մտահոգ մեր հայրենակիցները>>, - ամփոփելով իր խոսքը` նա արևոտ ու պայծառ ապագա է մաղթել միջոցառման մասնակիցներին:

Օրվա առթիվ իր շնորհավորանքի խոսքն է հղել ՀԿՀ-ի նախագահ Հերմինե Փախանյանը` անդրադառնալով դպրոցի կառուցման ընթացքում ունեցած դժվարություններին, որոնք այսօր պատվով հաղթահարվել են պատասխանատուների ջանքերի շնորհիվ: Այդ ճանապարհին նրանց մեծ ուժ և ոգևորություն է ներշնչել դպրոցի սաների առջև ստանձնած պատասխանատվությունը:

Այնուհետև Արմավիրի թեմի առաջնորդ Տեր Սիոն եպիսկոպոս Ադամյանի կողմից կատարվել է դպրոցի օրհնության կարգը, որից հետո նորաբաց դպրոցի տնօրեն Նազիկ Բաբայանի ուղեկցությամբ մարզպետ Գագիկ Միրիջանյանը և հյուրերը շրջել են կրթօջախում, ծանոթացել իրականացված աշխատանքներին և ուսումնառության համար ստեղծված պայմաններին: