Արմավիրի մարզպետի աշխատակազմ

ՀՀ Արմավիրի մարզպետ Համբարձում Մաթևոսյանն ԱՄՆ Միջազգային զարգացման գործակալության (ՄԶԳ) հայաստանյան գրասենյակի տնօրեն Ջոն Ալելոյի հետ Մրգաշատ համայնքում այսօր ծանոթացել է «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության» (ԳԱՏՕ) ծրագրի կողմից և ԱՄՆ ՄԶԳ հայաստանյան գրասենյակի միջոցներով ոռոգման բարելավման ուղղությամբ իրականացված աշխատանքներին, որոնց մասնակցություն է ունեցել նաև համայնքապետարանը:

Իրականացված ծրագրի արդյունքում 1970-ական թվականներին շահագործման հանձնված պոմպակայանի հզորացմամբ շուրջ 30 հեկտարով Մրգաշատում կավելանան մշակովի հողատարածքները՝ նոր ֆինանսական հնարավորություններ ստեղծելով շուրջ 150 գյուղացիական տնտեսությունների համար:

Կարևորելով օրվա նշանակությունը Մրգաշատ համայնքում՝ մարզպետ Համբարձում Մաթևոսյանը նախ նշել է, որ Մրգաշատն Արմավիրի մարզի ամենամեծ, պատրաստակամ և պահանջատեր համայնքներից մեկն է, որտեղ ենթակառուցվածքների զարգացմանն ուղղված բազում ծրագրեր են իրականացվել:

Թվարկելով միայն վերջին երեք տարում համայնքում ՀՀ կառավարության աջակցությամբ իրականացված ճանապարհաշինական, երաժշտական դպրոցի, մանկապարտեզի վերանորոգման, հակակարկտային կայանների տեղադրման աշխատանքները, ինչպես նաև նոր դպրոցի կառուցման ծրագիրը՝ մարզպետն անչափ կարևորել և բարձր է գնահատել նաև ԱՄՆ ՄԶԳ հայաստանյան գրասենյակի կողմից Մրգաշատում և մարզի ևս յոթ համայնքում մասնավորապես ջրային ոլորտի ենթակառուցվածքների զարգացմանն ուղղված ծրագրերը:

Նա իր խոսքում նշել է, որ վերջին տարիներին Արմավիրի մարզում ավելի քան 250 կմ ոռոգման նոր համակարգ է կառուցվել: Այդուհանդերձ, Համբարձում Մաթևոսյանն ընդգծել է, որ մարզում դեռ կան հողատարածքներ, որոնք շուրջ 20 տարի է, ինչ չեն ոռոգվում: Նա միաժամանակ հույս է հայտնել, որ ՀՀ կառավարության և գործընկեր միջազգային կազմակերպությունների աջակցությամբ առաջնահերթության կարգով այդ հարցին ևս լուծում կտրվի:

Բարձր գնահատելով ԱՄՆ ՄԶԳ հայաստանյան գրասենյակի կողմից Արմավիրի մարզում իրականացված և շարունակվող ծրագրերի կենսական կարևորությունը համայնքային ենթակառուցվածքների զարգացման տեսանկյունից՝ մարզպետ Համբարձում Մաթևոսյանը շնորհակալություն է հայտնել գրասենյակի բոլոր գործընկերներին՝ ի դեմս տնօրեն Ջոն Ալելոյի:

Հատկապես Արարատյան դաշտավայրում կարևորելով ոռոգման նշանակությունը՝ պայմանավորված գյուղատնտեսության՝ հիմնական եկամուտի աղբյուր լինելով՝ ԱՄՆ ՄԶԳ հայաստանյան գրասենյակի տնօրենն ուրախությամբ նշել է, որ Մրգաշատ համայնքի ղեկավարության և ջրօգտագործողների ասոցացիայի հետ համագործակցության արդյունքում այսօր ձևավորվել է ոռոգման մի համակարգ, որի շահառու է հանդիսանում համայնքի 150 տնտեսություն:

Անդրադառնալով մինչ ծրագրի իրականացումը համայնքի ոռոգման համակարգում առկա խնդիրներին՝ Ջոն Ալելոն նշել է, որ ջանքերի համատեղման և ծրագրի իրականացման արդյունքում հնարավոր է դարձել ոչ միայն նոր հողատարածքներ մշակել, այլև խնայողություններ ունենալ. «Ոռոգման ցանցի տեխնիկական արդիականացման շնորհիվ հնարավոր կլինի տարեկան խնայել 228,000 մ³ ջուր և 59,280 կՎտժ էլեկտրաէներգիա: Արդյունքում շուրջ 4 մլն դրամ արժողությամբ խնայողություն կլինի, որը համայնքը կարող է ուղղել այլ ծրագրերի իրագործմանը»։

«Այս գործընկերային ծրագիրը ոչ միայն ցույց է տալիս որ հնարավոր է նմանօրինակ նախաձեռնությունների միջոցով կիրառել Արարատյան դաշտավայրի թանկարժեք ջրային ռեսուրսները, այլև կայուն և երկարաժամկետ զարգացում ապահովել համայնքների համար»,- ամփոփելով իր խոսքը նշել է Ջոն Ալելոն:

Հավելենք, որ ծրագրի ընդհանուր աժեքը կազմել է 26,500 ԱՄՆ դոլար, որից 21,500-ը ԱՄՆ ՄԶԳ ԳԱՏՕ ծրագրի ներդրումն է, իսկ 5000-ը՝ Մրգաշատ համայնքինը։